Bernardo Silva a chhuak dawn

Manchester City captain Bernardo Silva chu season tawp rualin a chhuak ngei dawn niin a lang a, City assistant manager Pep Lijnders chuan, "Thawnthu duhawm takte pawhin tawp hun an nei ve ṭhin a ni," a ti a, hriatthiam theih takin a sawi.

Kum 31 mi Silva hi season tawp rualin a contract a zo tawh dawn a, contract thar a la ziah miau loh avangin La Liga hmahruaitu Barcelona, Serie A club lar Juventus leh MLS club ṭhenkhatte nen sawi zawm mek a ni.

Lijnders chuan, "Amah ang tak hmangin eng tin nge kan thlak theih ang? Amah ang an awm lo. Bernardo Silva hi player danglam bik tak a ni a, inkhel a thunun dan te, a chet dan, ball a dawn dan, hma a hruai dan, buaina a chinfel dan engkim mai hi en ila, player danglam bik a ni.

"Bernardo tel loa kan inkhelhna en ula, thlak a harsatzia chu inhmu thiam ang. Mahse, thawnthu duhawm takte pawh hian tawp hun an nei a, a hun tawp lam hi hlim taka a hman a, a phu ang ngeia kan thlah theih pawh ka beisei," a ti.

Portuguese midfielder Silva hian City tan kum kua khel tawhin, match 450 a khelhsak tawh a, goal 76 khungin, assist vawi 77 a nei - EPL nomawi paruk ngawt City tan a chawi a, 2022-23 season-ah phei chuan treble champion an ni hial a ni.