Trippier-a'n Newcastle a thlah

Kieran Trippier chuan season tawpa a contract zawh rualin Newcastle United a chhuahsan dawn a, "He hmun hi ka ngai dawn takzet a ni," a ti.

Kum 35 mi right back hian kum 2022 khan Atletico Madrid chhuahsanin Newcastle hi a zawm a, hun rei tak nomawi chawi tawh lo club hi season hmasa khan League Cup-ah a champion pui.

Trippier chuan, "Mimal tak pawhin, ka hun tawn duhawm leh harsaah pawh, fan-ten min thlawp tlat avangin lawmthu ka sawi a ni. Ka khelhpui te, ka ngai dawn hle mai che u.

"Zinkawng duhawm tak kan zawh ho a, nangni nena nomawi kan chawi kha, ka career-a ka hun tawn duhawm ber a ni," a ti a, kum 2021-a Atletico tana La Liga nomawi a chawi ai pawhin a ngaihlu zawk niin a lang.

Trippier hi January 2022-a Magpies-in an lei khan, Saudi Public Investment Fund-in English club a lei hnua an player lakluh hmasak ber a ni a, kum 2023 leh 2025 khan Champions League khel turin a kaipui bawk.

England international hlui Trippier hian Magpies-a la luttu Eddie Howe pawh a fak a, English manager pawhin, "Khelmual chhung leh pawnah kan tan a thawhhlawk hle," tiin a player a thlah let.

Howe chuan, "A khelh dan chu level sang ber a ni a, a khelhpuite tan khelhpui a nuam ṭhin hle. A theihna sang tak hian team a pui nasa em em a, ball cross thiam bik a nihna hian a ṭhiante goal khung tur tam tak a siamsak," a ti a, hruaitu ṭha tak a nihna chu a fak tel bawk.