Vawiin aṭangin CYMA Cricket quarterfinal

13th Inter-Branch YMA Cricket Tournament 2026-ah nimin khan last 16 khelh zawh a ni a, team riat chiah an dam tawh. Vawiin aṭangin quarterfinal khelh a ni dawn a, chawhma dar 9:00-ah Sihphir leh Chanmari an inkhel ang a, chawhnu dar 1:00-ah Ramhlun North leh Luangmual te an inkhel chhunzawm ang.

April 8, Nilainiah quarterfinal khelh a ni leh dawn a, champion lai Ramhlun Venglai leh Ainawn Veng te chawhma dar 9:00-ah an inkhel ang a, Chaltlang leh Hunthar te chawhnu dar 1:00-ah an inkhel ang.

Sihphir Vs Chanmari

Central YMA hnuai inelnaah Chanmariin football, cricket leh basketball-ah nomawi an chawi vek tawh a, cricket inelnaah pawh team ṭha zingah an tel pha. Chutihrualin Sihphir hian tun hnaiah nasa takin hma an sawn a, Chanmari hneh thei tur team an ni thung.

Chanmari tan veteran player LV Lalthantluanga a che ṭha a, match hnih a khelh tawh aṭangin run 73 siamin an team zingah run a la siam tam ber. Chutihrualin R. Lalrinchhana (61), Zothantluanga (38), Zuia (37) leh Zoremliana (36) te vawi khat chiah an lalut a, Sihphir lakah Chanmari batting line up fiahin an awm dawn.

Siphir lamin C. Vanlalṭhafamkima an kawl a, tun inelnaah run 165 siam tawhin Durtlang North an hmachhawn ṭumin century a siam. Tun inelna bikah Ramhlun North captain Joseph Lalthankhuma chauh run siam tam lamah tluk lo a nei.

C. Vanlalṭhafamkima thlawp turin Zualtea (67), Zothansanga (35), H. Laldinsanga (32) leh Rony Lalruatpuia (32) te an awm a, chutihrualin an khingpui hi Chanmari an nih avangin an fimkhur erawh a ṭul ang.

Ramhlun North vs Luangmual

Cricket inelnaah Ramhlun North aiin Luangmual buk a rit zawk a, chutihrualin tun ṭum inelna bikah erawh eng team pawh chak thei an ni. Ramhlun North hian quarterfinal lut turin Tlangnuam leh Champhai Venglai te an hneh a, Zomuanpuia'n hnehna an chan theih nan match hnihah run 76 a siam.

Batting lamah Emanuel Sailo (62), Francis (42), Lalnuntluanga (22) leh Lalmuanpuia Zote (21) te chu Zomuanpuia thlawp thei tur an ni ang. Luangmual hian quarterfinal lut turin Tlangnuam Vengthar leh Upper Republic te an hneh thung

Luangmual tan H. Lalbiakhlua'n run 46 siamin an team zingah a la siam tam ber a, Mizoram aiawha feh chhuak fo tawh G. Lalbiakvela'n run 45 a siam tawh bawk. Bowling lamah Biakvela'n wicket khat chiah a la la a, C. Lalbiaksanga'n wicket ruk a la tawh thung. Luangmual tan Ramhlun North hi fiahna hmasa ber a ni ang.