Ferrari-in Hamilton ngaihsak tawk lo - Irvine

Ferrari driver hlui Eddie Irvine chuan Italian team hian kum 2026 F1 title lak an tumna kawngah beihpui an thlak dawn em, tih a ngaihvenin a sawisel a, nikum aiin hma an sawn tih erawh a pawm thung.

Japanese Grand Prix zawh hnu khan Irish driver hlui chuan, Ferrari hmasawnna chu lang viau mah se, champion tur khawpin an car inremkhawm danah harsatna an la nei tih a sawi.

Irvine chuan "Scuderia (Ferrari) tan chuan thil hi a harsa tlat reng a ni. Harsatna lian ber chu Formula 1 inpui ber United Kingdom aṭanga an hlat lutuk hi a ni," a ti. Kum 2025-a an car balance leh tyre enkawl kawnga an harsatna, an tumpuite an tluk loh ṭhinna lakah khan Ferrari hian kum 2026 tan erawh bul an tan ṭha viau thung.

Kuminah podium inchuh zingah Ferrari driver te hmel hmuh tur a awm fo tawh a, chakna tak erawh tun thlengin an la chang hleithei rih lo thung. Kum 2026 chhunga thil thleng langsar tak pakhat chu Lewis Hamilton-a rawn che thar leh hi a ni. Hamilton hian hun rei tak Mercedes-a a awm hnuah Ferrari a zawm a, nikum lamah erawh a che ṭha tawk lo hle.

Hamilton a insawn avang hian mi tam takin Ferrari an ngaihven phah a, mahse British driver hian hmun ṭha zawk a zawnna kawngah beisei a pha lo hle thung. World champion ṭum sarih ni tawh hi kuminah erawh a che chhe hran lo a, Chinese Grand Prix-ah phei chuan Ferrari tana a podium hmasa ber a hlawhchhuak a, a teammate Charles Leclerc-a tluk lo.

Podium-a Hamilton rawn lan leh chungchangah Irvine chuan, "Thil ropui tak a ni a, a team lawm a hlawh tawk loin ka hria. Mahse China-a track kha chu a hnehsawh zawng tak a ni hrim hrim a, Ferrari tan a podium hmasa ber hlawhchhuak mah se a ropui tawk lo. Japan-ah kha chuan intlansiak chhung zawngin Charles Leclerc a ngam lo hle," tiin a sawi leh a ni.

Leclerc hian qualifying-ah leh race chhungin, track khirh deuh laiah Hamilton hi a la lehthal deuh reng a. Chu chu Suzuka-ah pawh a chiang hle a, Hamilton-a tan a lawmawm loh rualin Ferrari erawh a team angin an che ṭha hle.