LeBron James ngam loh Flagg

Nimin zing NBA regular season khelhah Dallas Mavericks chuan 134-128 in Los Angeles Lakers an hneh a, Cooper Flagg leh Lebron James te an team ve ve tan langsar mah se, a tawpah kum 19 mi Flagg-a dingchang zawkah a ṭang a, Mavericks a chakpui.

American Airlines Center, Dallas-a inkhelah Mavericks tan Flagg a che ṭha lehpek a, point 45 leh assist pakua neiin rebound vawi riat a la a, triple double a siam teuh hle. Flagg hian match zawna point 40 a score tlinna chiah a ni a, Inrinni khan Flagg hian Magic lakah point 51 a lo score tawh a, NBA teenager zingah hetiang ti thei hmasa ber a ni.

Flagg hi PJ Washington (15), Brandon Williams, Naji Marshall (13) leh Klay Thompson (11) ten an thlawp ṭha bawk a, Lakers lakah Mavs player te an ṭangrual a. Dwight Powell chiahin point a nei lo.

Veteran LeBron-a'n Lakers tan point 30 leh assist 15 a nei a, Luke Kennard-a'n point 15 leh assist 11 bakah, robound vawi 16 a la a, triple double a siam. Anni bakah hian Jaxson Hayes (23), Rui Hachimura (21), Jake LaRavia (14) leh Deandre Ayton (13) te an khel ṭha bawk. Lakers hi khel chhia tia sawi tur ni lo mah se an vanduai zan an tawng a, point rukin an chak lo.

Lakers hian an scoring leader pahnih Luka Doncic leh Austin Reaves te an chhawr thei lo a, Doncic leh Reaves te tel loin an ṭha tawk lo. Player pahnihte hi an chawlh chen tur la hriat loh mah se, regular season-ah an lo kir a rinawm tawh loh.