Goal luh tam zanah Inter an chak

Pathianni zan Serie A inkhelah hmahruaitu Inter Milan chuan 5-2 in AS Roma an hneh a, Inter hian an hmahruaina belhchhahin, champion an hnaih tawh hle.

Inter tan Lautaro Martinez-a'n goal hnih a khung a, Hakan Calhanoglu, Marcus Thuram leh Nicolo Barella ten goal khat ṭheuh an khung bawk. Roma tan Gianluca Mancini leh Lorenzo Pellegrini te goal khung chu scoreline chei mawitu chauh a ni.

Goal a sur

San Siro-a inkhelah goal a lut hma a, minute khatna lekah mualneitu tan Thuram-a cross satliah chu Martinez-a'n chiang zetin a pet goal. Martinez hi goal khung turin a insiamrem ṭha a, chutihrualin Roma defender ten an veng ṭha tawk lo.

Team pahnihte innawr tawn mah se goal hmuh tur a awm lawk lo. Minute 40-naah goal kan hmu leh chauh a, a khungtu erawh Roma an ni. Devyne Rensch-a cross chu Pellegrini-a'n ṭha takin a tauh lut a, an si phurh a sut.

Roma lawm chhung a rei lo a, minute sarih hnu lawkah goal an chhuah lehnghal. First half tawp hma hretin Calhanoglu-a'n yard 35 vela hla aṭangin a pet goal a, goal mawi bik a ni. 2-1 a hmahruai chungin Inter-in chawlhlawk an hmang.

Second half-ah pawh Inter an hlauhawm chhunzawm a, minute 52-naah counter aṭanga nawrin Thuram-a'n vengtu nei lo Martinez tan a pe a, Martinez-a'n tawih taka khungin an hmahruaina a belhchhah a, a goal hnihna a ni bawk.

Inter-in an la duhtawk mai lo a, minute thum hnu lawkah Calhanoglu corner pet chu Thuram-a'n a tauh lut leh nghal a, Roma an inring hman lo. French forward Thuram a khel ṭha takzet.

Cristian Chivu naute an phur laklawh a, minute riat hnu lawkah Barella-a'n chiang kawh zetin goal kilah tak a pet lut a, Roma keeper Mile Svilar tan dan ngaihna a awm lo.

Minute 70-naah Roma tan Donyell Malen-an thawh rah sengin Pellegrini-a' a pet goal ve leh a, mahse an mualpho lutuk tur hliahtu chauh a ni. Goal dang lut tawh loin hun a tawp a, nuamsa takin Inter an chak.

Champion a hnai

Serie A-ah match sarih chiah Inter hian khelh tur an nei tawh a, an hmelma AC Milan nen point kuain an inthlau mek a, champion an hnaih tawh hle. Inter hian nikumah Napoli lakah uiawm takin an nomawi kawl lai an hloh tawh a, tun season-ah thleng nawn turin an duh tawh dawn lo a, an kutah engkim a innghat tawh.

Thu lawmawm dang Inter tan a awm a, an goal khung khawl Lautaro Martinez a dam ṭha leh tawh. Argentine forward hi Champions League-a Bodo/Glimt an hneh loh ṭuma a inhliam hnuah a la inkhel mumal lo a, a awm loh chhungin a hmun ruak luah khat zo an awm lo.

Kum 28 mi Martinez hian Serie A-ah goal 16 khungin a khung hnem ber a, Inter chet ṭhat nan a pawimawh hle. Martinez hian a dam chiang tawh tih lantirin goal a khung leh tawh a, champion an tum a nih chuan a dam ṭhat a ngai.