Cindy telna India U20 dinhmun a ṭha lo

Mizo tleirawl Cindy Remruatpuii Colney telna India Under-20 chuan AFC U20 Women's Asian Cup-ah match hnih khel tawhin an la chak lo ve ve a, vawiin dar 2:30 hian Chinese Taipei nen an match thumna an khel ang - inkhel hi FanCode-ah live-in a en theih ang.

India U20 hi an awmna group-ah an vanduai ve bawk a, match hmasa pahnihah khawvel ang pawha team ṭha zinga tel phak Japan leh Australia an hmachhawn - Japan lakah hian 6-0 in an tlawm a, Pathianni khan Australia lakah 5-0 in an tlawm leh bawk.

Mizo tana a lawmawm lai erawh match hnihah hian Cindy a khel tluan ve ve a, vawiin dar 2:30-a Chinese Taipei nena an inkhel turah pawh bul ṭan leh tura beisei a ni.

India tan beisei erawh a la bo tawp lo a, vawiina Chinese Taipei hi an hneh thei a nih chuan quarterfinal lut thei dinhmunah an la ding dawn - an hmachhawn tur team hi anmahni ang thoa chak la nei lo ve tho an ni bawk!

Hriat tel tur chu AFC U20 Women's Asian Cup khelh phak hrim hrim hi India tan chuan hlawhtlinna a tling phak - tun hi kum 20 hnua he inelna khel tura an tlin lehna hmasa ber a ni.

U20 Women's Asian Cup-ah hian ram 12 chiah telin, group pathumah ṭhen an ni a, group tina a sang pahnih leh, pathumna tiṭha pahnihte chuan knockout round an lut dawn a ni.