Ka nu tan ka hlan - Liansanga

Indian Football League-ah Diamond Harbour-in Thawhṭanni khan Namdhari 5-4 in an hneh a, Lalliansanga Renthleiin hun tawp dawn hnaiah goal pawimawh a khung. Kolkata club hian hnehna an chan avangin match sarih aṭangin point 16 an hmu a, an hnuai chiaha awm Sreenidi Deccan nen champion tur leh ISL khel tur zawnna 'promotion round' khel turin an tling tawh.

Lunglei tlangval Liansanga chuan, "Ka goal kha chu ka nu tan ka hlan a, ka ngai hlu takzet a ni. Engkim mai kha ka nu tan vek a ni e," tiin Vanglaini a hrilh. Liansanga nu Lawmsangzuali Sailo chu March 14, Zirtawpni khan nat lawkna awm loin a thi a, Diamond Harbour midfielder hian Lajong hmachhawn thei loin Mizoram a pan nghal a, Kolkata club-in RG Stadium-a Aizawl FC an hmachhawn ṭum pawhin a khel thei lo.

April 2, Zirtawpni khan Diamond Harbour-in Real Kashmir 2-1 in an hneh a, Liansanga hi bench aṭanga lutin tun ṭuma Namdhari an hneh ṭumah pawh bench aṭangin a lut. Kolkata club tan hian Mizo pathum Lalremruata, Paul Ramfangzauva leh Samuel Lalmuanpuia ten Punjab club lakah hian bul an ṭan a, R. Ramdinthara a lut lo thung. Diamond Harbour-ah hian Mizo paruk an awm a, Sairuatkima pawhin a pa boral hnuah training a zawm leh tawh bawk.