Dipankur hnuaiah Chanmari an chak ta

Indian Football League-ah Chanmari FC-in Srinagar khaw vawt hnuaiah mual neitu Real Kashmir 2-1 in an hneh a, coach thar Dipankur Sharma hnuaia an chakna hmasa ber a ni.

Thawhṭanni zan inkhelah Brazilian defender Marlon hmangin Chanmariin hma an hruai a, Marius Obekop hmangin Real Kashmir-in siphurh an sut mah se Mizo club tan Lalruatsanga'n chakna goal a khung.

An inremfuh ṭan

Chanmari FC manager Dinpankur-a'n Rajasthan United an hneh loh ṭumin tihsual lian tak a neiah a ngaih theih a, midfielder Joel Lalramengmawia bench-ah a dah. Real Kashmir lakah erawh Joel-a'n bul a rawn ṭan a, bench-ah Ghanaian midfielder Badu a awm thung.

Serchhip tlangval Lalruatsanga'n Bethlehem Vengthlang tlangval Suangaihmuana aiah bul a rawn ṭan bawk. RS-a hi KC Malsawmsanga leh Jota ten an thlawp a, ball sem turin Christopher Kamei leh Aron Vanlalrinchhana te an awm.

Goal khat phawt

Real Kashmir-in an mualah result ṭha neih ngei an tum a, Mizo club lakah inkhel bul an ṭan ṭha. Marius Obekop-a'n box pawn aṭangin chance a insiam a, goal zawnah a kal lo.

Mahse Chanmariin goal khungna remchang an nei ṭha zawk a, Aron-a siam ṭha zet chu Sawmsanga'n goal-ah a chantir thei lo. Chutihrualin, Real Kashmir tana Mohammad Inam-a shot-cross chu Marlon-a'n a dan ber hnuah goal ban a per a, Chanmari an him hlauh. Maurius pawhin crossbar a pet per a, Chanmari an vannei zel.

Real Kashmir-in goal an khung theih loh laiin Mizo club erawh goal an khung. Christo-a freekick chu Marlon-a'n goalkeeper man hmain a tauh a, Chanmariin minute 43-naah goal hmahruai an khung.

Inkhel hmuhnawm

Second half-ah pawh Chanmari bawkin goal an khung hmasa a, Christo-a corner pet chu Ruatsanga'n minute 62-naah a tauh a lut. Mizo club dinhmun ṭha viauin lang mah se minute hnih hnuah Real Kashmir-in Marius Obekop hmangin freekick aṭangin an khung.

Marius hian freekick pet ṭha tho mah se Chanmari 'wall' a pawp a, goalkeeper Zothanmawia tan tih ngaihna a awm lo. Real Kashmir ṭantute thawm a ring a, inkhel a nung sawt bawk. Mualneitu lamin an nawr na a, Mizo defender Papuia tihsual vangin Shedrack Charles-a'n chance ṭha bik nei mah se hnai tak aṭangin a pet over.

Mizo club-in goal venhim hna an thawk a, hun tawp lamah tlarhnung tichak turin C. Lalmuanpuia, Suanngaihmuana, Luca Pedro bakah Lalrinchhana Tochhawng te an lut. Mizoram captain hlui Rinchhana hi kum lamah upa ve ṭan tawh mah se an chhawr ngam a nih chuan pressure sangah a pawimawh chho thei ang.

Engtin zel?

Indian Football League-ah team 10 chauh an awm a, phase 1-ah hian match kua chauh khelh tur a awm avangin Chanmari FC-in match hnih chauh khelh tur a nei tawh. Dipankur Sharma hote hian April 11, Inrinni zan dar 6:30-ah Diamond Harbour an tlawh ang a, April 17, Zirtawpni zan dar 6:30-ah Namdhari an hmachhawn leh ang.

Chanmari hian match sarih aṭangin point riat an hmu a, pasarihnaah awmin relegation playoff pumpelh turin parukna chinah an awm a ngai. MPL12 champion chungchangah hian Diamond Harbour (16), Sreenidi Deccan (12), Shillong Lajong (11), Rajasthan United (11), Aizawl FC (9) leh Gokulam Kerala te an awm a, Dipankur hote hian match hmabak pahniha point ruk an hmuh theih chuan a sang paruk mai ni loin a sang pali zingah an awm theih a rinawm.