FA Cup semifinal intum tur a chiang

English football-a inelna ngaihhlut hlawh FA Cup semifinal-a inhmachhawn tur a hriat ta a, Liverpool laka 4-0 ngawta chak Manchester City chuan Southampton an hmachhawn dawn.

Hetihlai hian kum 39 hnua a vawi khat nana FA Cup semifinal lut Leeds United chuan Chelsea an hmachhawn dawn a, Liam Rosenior-a team Blues hian nomawi chawi an duh dawn avangin a awlsam lo ang.

Manchester City-in a zawna a vawi riat nan FA Cup semifinal an lut a, an hmachhawn tur hi Championship club Saints an nih avangin final lut ngei tura beisei an ni.

Hetihrual hian Saints hi Premier League hmahruaitu Arsenal pet chhuaktu an ni a, an inringtawk khawp ang - City pawh hi nikum final-a Crystal Palace ngam lotu an ni a, Pep Guardiola a fimkhur viauin a rinawm.

Saints hian kum 1976 khan FA Cup-ah hian nomawi an lo chawi ve tawh a, thawnthu hlui chu kum tam tak hnuah her lum leh an tum dawn - an hmachhawn tur City erawh vawi sarih champion tawh an ni thung.

Leeds-in semifinal-ah 2-2 a West Ham an inhnehtawkpui hnuin, penalty-ah 4-2 in hnehna an chang a, Chelsea an hmachhawn dawn ta - kum 1987 hnua FA Cup semifinal an luh leh hmasak ber a ni a, kum 1972-a an champion bak kha an la champion lo bawk!

Chelsea erawh vawi riat ngawt lo champion tawh an ni a, tun season-ah Rosenior-a team hian Premier League-ah beisei an phak lo a, Champions League an thlah tawh bawk - FA Cup champion ngei an duh dawn a, match hnih chak an la bak e.