Blazers laka Nuggets chakpuitu Jokic

NBA regular season khelh zawn a ni ṭep tawh a, nimin zing khan Denver Nuggets chuan 137-132 in Portland Trail Blazers an hneh a, an thiampuipa Nikola Jokic-a'n triple double a siam.

Ball Arena, Denver-a inkhelah Jokic a langsar ber a, Serbian center hian point 35 leh assist 13 a nei a, rebound vawi 14 la bawkin triple double a siam a, a career-ah vawi 216 a siamna a ni.

Jokic bakah hian a ṭhiante puihna a dawng ṭha a, Aaron Gordon (23), Jamal Murray (20), Cameron Johnson (17) leh Jonas Valanciunas (14) ten Nuggets chak nan an thawh hlawk hle.

Hetihlai hian Blazers an khel chhe bik lo a, player paruk ngawtin point 10 an score tling a, Sidy Cissoko tih loh chuan point a nei vek bawk. Mahse Blazers an vanduai a, point nga lekin an chak zo lo.

Nuggets hi Western Conference table-ah pathumnaah an awm mek a, playoff khel tura tling tawhin an hnuaia awm Lakers aiin match khatin an khel tam zawk a, match khat bawkin chak an ngah zawk bawk.