Semifinal-ah Sihphir leh Luangmual

13th Inter-Branch YMA Cricket Tournament 2026-ah Siphir-in champion tawh Chanmari hnehin semifinal an lut a, Luangmualin Ramhlun North sawpin quarterfinal an paltlang ve bawk. Vawiin hian quarterfinal khelh chhunzawm a ni dawn a, chawhma dar 9:00-ah Ramhlun Venglai leh Ainawn Veng an inkhel ang a, chawhnu dar 1:00-ah Chaltlang leh Hunthar an inhmachhawn chhunzawm ang.

Nimin Lammual inkhelah Chanmari vawm hmasak an thlang a, Sihphir top order lam che ṭha lo mah se middle order-a awm C. Vanlalṭhafamkima'n run 34 a vuak chhuah bakah Laltlansanga Pachuau-in run 47 a rawn siam bawk. Hruaia Vangchhiain run 21 siamin a tawp a khar ṭha a, over 20-ah run 176 siamin wicket ruk an hloh.

Chanmari tan target hi la umphak theih ni mah se opener LV Lalthantluanga'n run siamin loin pavilion lamah a kir a; Zothantluanga (27), captain Zuia (19) leh Vanlalruata (36) te zarah chak loh dan a lang mawi zawk. Chanmariin run 140 chauh an siam thei a, Sihphir run 36-in an chak.

Inkhel hnuhnung zawkah Luangmual an chungnung a, Ramhlun North-in over 18.2-ah run 52 siama an thih fai vek avangin Luangmual tan hna harsa a awm lo. Captain G. Lalbiakvela (19) leh Zaithanmawia (27) te an che ṭha a, over 10.1 lekah run 64 siamin hnehna an chang.