Arsenal dinhmun ṭhaa dahtu Raya leh Havertz

Champions League quarterfinal-ah Arsenal-in Estádio José Alvalade, Lisbon-ah Kai Havertz goal hmangin mualneitu Sporting Lisbon 1-0 in an hneh a, goalkeeper ṭha mi David Raya hmangin goal an venghim bawk.

April 15, Nilaini zanah UCL quarterfinal second leg hi Emirates Stadium-ah khelh a ni dawn a, away goal rule awm tawh lo chungin Arsenal dinhmun a ṭha zawk. Sporting mikhual hma hian Mikel Arteta hoten April 11, Inrinni tlai dar 5:00 hian Premier League-ah Bournemouth an hmachhawn ang.

Bul ṭantu Raya

Arsenal number 1 keeper-ah inhnialna tur a awm lo a, David Raya aia ṭha Gunners-in keeper an nei lo. Spanish keeper Raya hian Brentford aṭanga London club hi zawmin first keeper ni lai Aaron Ramsdale a nek chhuak. English keeper Ramsdale hi khelh tam duhin a chhuak a, Gunners-in Raya thachhang dawl turin Chelsea aṭangin Kepa Arrizabalaga an la lut.

Kepa hi khawvel goalkeeper man to ber a ni a, Arsenal a zawm hmain Real Madrid-ah pawh loan-in a kal tawh. Chutihrualin Kepa erawh Arsenal-ah Raya thachhang dawl tur a ni a, a man pawh £5mtd man chauh a ni. Mikel Arteta-a'n Kepa hi League Cup leh FA Cup inelna bikah no. 1 atan a hmang a, nomawi an chân phah.

Inelna pawimawh zawk Premier League leh Champions League-ah erawh Raya-a'n bul a ṭan zel. Sporting Lisbon hmachhawn turin Gabriel pawh a dam hman a, William Saliba nen an inkawp. Hliam vangin Bukayo Saka leh Eberechi Eze khel thei lo mah se Viktor Gyökeres telna Arsenal bul ṭantute an ṭha tawk.

A nung ṭha

Sporting Lisbon-in goal chance ṭha an nei hmasa a, left back Maximiliano Araújo-a'n through ball ṭha um lutin goalkeeper Raya chauh a hmachhawn hnuah kawh zetin goal-ah a pet a, Spanish keeper-in a khawih hram zarah crossbar a per a, Arsenal an him hram. Mualneitu lam goal bawh a na hle.

Gunners pawh Sporting tan buaina an siam ve tho a, Noni Madueke-a'n corner kick aṭangin crossbar a pet per a, a per let chu Martin Odegaard-a'n goal zawnah a pet thei lo. First half-ah goal hmuh tur a awm lo a, inkhel erawh a nung ṭha hle.

A hmuhnawm zel

Second half-ah inkhel a nung chhunzawm a, Martín Zubimendi-a'n box pawn chiah aṭangin goal kilah mawi zetin a pet lut. Spanish midfielder hi offside lo mah se ball ṭha a hmuh theihna tura thawh hlawk Viktor Gyokeres a offside vangin pawm a ni lo.

Arsenal-in goal duhin Kai Havertz, Gabriel Martinelli leh Max Dowman te an luhtir a, goal hmuh tur erawh a awm mai lo. Goalkeeper Raya bawk a langsar leh a, minute 83-naah Geny Catamo ball tauh ṭha zet chu a dang.

Substitute Martinelli a che ṭha a, Sporting keeper Rui Silva tan hna a siam bakah Gunners inkhel tinungtu a ni. Injury time-ah Brazilian forward Martinelli hian ball fing a pe lut a, Harvertz tlan thiam ve bawkin German forward hian chakna goal a khung.

Engtin zel?

Arsenal manager Mikel Arteta chuan, "Champions League-ah chuan khualmuala chak a harsa a, a bik takin mahni muala a zawna vawi 16 chak zawn tawh hneh a harsa zual. Kan khingpuite record hian kan hnathawh ropuizia a pholang," tiin a sawi.

Gunners-in hnehna an chan theih nan Arteta-a'n substitution a siam ṭha a, hemi chungchang hi sawiin Spanish manager chuan, "Tun season-ah match tawp lam kan khar ṭha ṭhin a, Sporting lakah pawh goal khung thei player pawimawhna a lang. Gabi (Martinelli) a rawn che ṭha em em a, danglamna a rawn siam. Chutiang bawkin Kai (Havertz) leh Max (Dowman) te pawh an pawimawh a, kan result-ah kan lawm hle a ni," a ti a, goalkeeper che ṭha David Raya a fak bawk.