April 10 zanah Inter Village Kick Off

MBOCWWB 8th ADFA Inter Village Tournament 2026 chu April 10, Zirtawpni zan dar 8:00 hian Chanmari YMA Hall-ah kick off neih a ni dawn. LESDE Department secretary Dr. Lalhriatzuali Ralte, IAS chu khuallian a ni ang.

Tun ṭum inelnaah hian team 66 an tel dawn a, Indian Football League club nei Chanmari veng chu tel lo langsar an ni. Inkhel thiam veng dang erawh an tel ṭha a, veng/khua inelna hmuhnawm tak a beisei theih ang. Kick off ṭan hma hian zan dar 7:00-ah manager meeting neih tur a ni a, hemi zan hian fixtures tlangzarh a ni bawk dawn.

Inelna hi ADFA buatsaih a nih avangin Aizawl District huam chhunga veng leh khua chauh an tel thei a, hei vang hian tun ṭum inelnaah pawh hian ṭum dang veng/khua inelna aiin tel an tlem zawk. Chutihrualin ADFA hian hlawhtling takin NECS Cup leh LPS Cup a buatsaih tawh ṭhin a, tun ṭum inelna pawh hian ngaihven a hlawh khawp ang.