Romania legend Lucescu a thi

Romanian football-a hming dai tawh ngai lo tur, coach Mircea Lucescu chu kum 80 mi niin a thi a, Thawhlehni zan khan amah enkawltu damdawi in Bucharest University Emergency Hospital chuan Lucescu thih thu hi an puang.

Lucescu hi Romania national team coach niin, World Cup a hruai thlen zawh loh avangin a hna aṭangin a bang a, a hna aṭanga a ban aṭanga ni nganaah a thi.

Romanian Football Federation chuan thuchhuah siamin, "Kan ram legend ni reng tur Mircea Lucescu thihna hian min ṭhawngin na kan ti takzet a, kan football khawvel chuan tactician ropui tak a chân a ni mai lo a, khawvel huapa kan ram football pholangtu a chân a ni," an ti.

Lucescu hian kum 1981 - 1986 inkarah khan Romania hi lo enkawl tawhin, Euro 1984-ah a vawi khat nan a tlinpui a, World Cup 1986 erawh point khat chiaha Northern Ireland phak loin an tling zo lo.

Kum 2024 khan an ram team enkawl tur hian kir lehin, World Cup erawh a hruai thleng zo ta chuang lo a, playoff-ah 1-0 a Turkey ngam loin, an tum ram an inpetkai zo ta lo a ni.

Player a nih laia Romania tana vawi 64 inlan thei Lucescu hian kum 47 zet coaching hna chelh tawhin, Inter Milan, Galatasaray, Besiktas, Shakhtar Donetsk, Zenit St Petersburg, Dynamo Kyiv leh Turkey te pawh a lo enkawl tawh.

Galatasaray chuan, "UEFA Super Cup leh kan league nomawi 15-na min lakpuitu Lucescu kan zingah a awm ve ta lo tih hriat chuan min ṭhawng hle. Luce, thlamuang takin chawl la, kan theihnghilh ngai lo ang che," tiin an thlah.

Inter Milan chuan, "Inter chhungkua chuan Mircea Lucescu thihna kan tuar takzet a, a kalsan tak a chhungte kan hre reng a ni," an ti.

Romanian FF president Razvan Burleanu chuan, "Romania leh football khawvel tan hun thim a ni. Lucescu kha coach a ni mai lo a, player-te tana zir tur hnutchhiah tu, eng dang zawng aia football hmangaihtu a ni.

"Kan ram football tana a hnathawh hi sawisen rual a ni lo," a ti a, World Cup 1970-a an ram team captain ni bawk Lucescu a thlah.