Man United-in Villa midfielder an ngaihven

Aston Villa midfielder Amadou Onana chu an elpui, Manchester United chuan an ngaihven niin khawthlang chanchinbu ten an ziak. Onana hi European club langsar Barcelona pawhin duh mah se, United hming a ri ring hle.

Man United hi an midfielder tawnhriat ngah, Casemiro-a'n season tawpah a chhuahsan dawn tih a sawi chiang tawh a, a thlakna tur an melh nghal a, Onana hian an mit a la.

Belgian midfielder Onana hi pound maktaduai 50 aiin a tlawm dawn lo a, mahse Premier League-ah tawnhriat a neih sa a, Michael Carrick-a hnuaia khel tura an duh zingah a tel.

Hetihlai hian Red Devils hian tun nipuiah Manuel Ugarte chu hralh an tum a, Uruguay international hian Old Trafford-ah beisei a phak loh avangin, player thar lakna tur sum siam nan hman an tum a ni.

Aston Villa chuan Ugarte hi an ngaihven hle nia hriat a ni a, chuvangin player inthleng a thleng thut thei bawk. United hian he inremna hi a hlawhtlin theih nan pound maktaduai 10 vel an pek belh leh a ngai maithei bawk. Red Devils hian player pahnihte hi an inthleng thei a nih chuan midfield an thuam chak bakah, kum 2024-a an lak luh beisei pha lo Ugarte-a man hi ṭha takin an hmu let leh dawn tihna a ni.

Ugarte pawhin Villa Park-ah hian Europe inelnaah a la khel thei dawn a, club chhungah inelna a tlem deuh dawn bawk avangin khelhna hmuna chang tam dawn a, Villa pan a hreh lo ang.

Zaninah dar 12:30-ah Aston Villa hian Europa League quarterfinal-ah Bologna an hmachhawn dawn a, Onana pawhin bul a ṭan a rinawm. Unai Emery hoten tun season-a nomawi an chawi theih awmchhun a ni tawh a, chak ngei an tum dawn.