Inter Kashi-in Chennaiyin an hneh

Indian Super League-ah Thawhlehni zan khan Inter Kashi chuan hnehna an chang a, an mikhualna ramah Chennaiyin chu 2-1 in an hneh.

Inter Kashi tan Alfred Moya chuan goal hnih a khung a, Chennai club tana hun pek belha Daniel Chima Chukwu-a goal khungin awmzia a nei phak tawh lo.

I League champion Inter Kashi tan tun season ISL-a vawi hnih an chakna chiah a ni a, Chennaiyin erawh match ruk an khelh tawhah vawi khat chiah an la chak thung.

Thawhlehni zan inkhelah hian Chennaiyin tan Laldinliana Renthlei chuan inkhel bul ṭanin, Mizo player dang inlan an awm lo thung.

Zanin dar 7:30-ah ISL inkhel pakhat a awm dawn a, hmahruaitu Mumbai City chuan pathumna Jamshedpur FC an lenchilh dawn - team pahnih inkarah point thum chauh a awm a, inkhel a hmuhnawm dawn.

Mumbai hi captain Lallianzuala Chhangte hoin an hmuhnawm ṭhin a, LZa bakah Hmingthanmawia Ralte (Valpuia) leh Lalnuntluanga Bawitlung ten inkhel bul an ṭan ṭhin a, bench aṭangin Zothanpuia a lut ṭhin bawk.

Jamshedpur lamah pawh Mark Zothanpuia chu player pawimawh niin, C. Lalhriatpuia a awm bawk a, zaninah champion tumin Mizo player-ten hmun pawimawh an channa team pahnih an inkhel dawn e.