CYMA Cricket 2026: Ruahsur vangin vawiinah semifinal khel dawn

Central YMA leh Cricket Association of Mizoram buatsaih 13th Inter Branch YMA Cricket Tournament 2026 semifinal chu ruahsur vangin niminah khelh zawh theih a ni lo a, vawiinah khelh ṭhat a ni ang. Chawhma dar 9:00-ah champion lai Ramhlun Venglai leh Sihphir ten a bul aṭangin an khel ṭha leh ang a, chawhnu dar 1:00-ah Luangmual leh Chaltlang te an inkhel leh ang.

Inelna hi Lammualah khelh a ni a, LPS Vision-in live telecast-in YouTube-ah an pe chhuak. Final hi April 11, Inrinnia khelh tura ruahman a ni.

Warm Up match

Ṭhumvawrah Sihphir an vannei a, vuak hmasak an thlang. Opener pahnih H. Laldintluanga (19) leh Rony Lalruatpuia (16) ten bul an ṭan ṭha tawk lo a, chutihrualin an khingpui hi Ramhlun Venglai an nih miau avangin an run rate ṭha tawk lo hi dem theih a ni lo.

Opener Dintluanga'n mualpho tur hliah khuh nan fimkhur takin a khel a, thlawptu a nei ṭha tawk lo. Captain C. Vanlalṭhafamkima'n run khatmah a siam lo a, Zothansanga pawh run 10 chauh a siam. Ruahsurin Sihphir a chhan a, over 14 chauh an khelh hman a, RVL an bat hman loh avangin a bul aṭangin an khel leh dawn.

Semifinal

Warm up match anga ngaih theihah Ramhlun Venglai bowler-te an che ṭha a, Dika Ralte phei chuan over hnihah run khat chauh a pe a, Vanlalrinzuala'n over li vawm tawhin run 17 pein wicket thum a la. Nimin lama an khelh lailawkah Sihphirin RVL bowler-te an ngam lo. Hei vang tak hian Sihphirin final lut turin risk an lak a ṭul a, ṭhumvawra an vannei nawn a nih chuan vawm hmasak an thlan tawh rinawm.

RVL erawhin semifinal lut turin Ainawn run 297-in an sawp a, ṭhumvawra an vannei a nih chuan bat hmasak bawk an thlan a rinawm. Ainawn an sawp ṭum hian Mizoram captain Joseph Lalthankhuma'n run nga chauh a siam a, Sihphir lakah run tam zawk siam a tum ang. Nimin lama an khelh dan leh an squad thlir chuan RVL hi chak tur chiang sa an ni a, mah se over 20 inelna a nih miau thilmak thlen theih dan a awm ve tho.

Luangmual leh Chaltlang

Nimin lamah Luangmual leh Chaltlang an khel hman lo a, vawiin lamah an khelh dawn chauh avangin Chaltlang pawhin hahdamna hun ṭha an nei ta chiah.

Semifinal lut turin Luangmualin Ramhlun North an sawp a, Chaltlang erawhin inkhel boruak sang takah Hunthar an hneh hram. Team pahnih hi player neih dan chhutin an intluk tawk a, quarterfinal-a an chak dan aṭanga team dinhmun thlir a rem lo ang. G. Lalbiakvela telna Luangmual leh Bobby Zothansanga telna Chaltlang inkhel turah hian chak tur zawk hriatthiam a har hle.