Mizo inchai title fight : Palaihawl champion lai chotu Mamit tlangval

Mizo inchai palaihawl champion lai Remruatpuia'n chotu a nei a, Bethlehem Vengthlang tlangval hmachhawn turin Mamit tlangval Ramropuia a rawn ding chang a, palaihawl category-ah Mizo inchai title fight hmuh tur a awm dawn.

Nikum khan palaihawl champion challenger tur hi zawn a ni tawh a, hemi ṭuma pakhatna Saitual tlangval Ngursangzuala chu rokhawlhna lian tak a neih avangin a inhnukdawk. Nimin khan palaihawl champion challenger tur zawnna a neih a ni a, inbuan chak mi pathum Mamit tlangval Ramropuia, Kolasib tlangval pahnih Zoremmawia leh VL Remmawia te an pen chhuak.

Inbuan chak mi pathumte hi vawi khat ṭheuh an inhmachhawn a, kum 33 mi Ramropuia hian a elpui Kolasib tlangval pahnihte hi vawi thum ve ve bawhbehin palaihawl champion chuh thei dinhmunah an ding.

Mizo inchai title fight hi kumin October thla hian LPS Arena-ah neih a ni dawn a, hemi chungchangah hian vawiin chawhnu dar 1:00 hian Mizoram Wrestling Association leh LPS ten inremna thuthlung an ziak ang.