Goa khelmualah Odisha leng dawn

Nilaini zanah Indian Super League inkhel a awm lo a, vawiinah match hnih khelh tur a awm dawn thung - tlai dar 5:00 hian NorthEast United chuan Sporting Club Delhi an mikhual ang a, zan dar 7:30-ah FC Goa-in Odisha an lo mikhual thung ang.

Manolo Marquez hnuaiah Goa hian beisei an phak lo a, tun season-a match sarih an khelh tawhah vawi hnih chiah an la chak - vawi li an khingpui an draw a, vawi khat tlawm an nei.

Goa tan champion beisei ngam chi a ni tawh lo a, chutihrual chuan mualpho loa season khar turin chak an mamawh - he team hian Dinthar tlangval Ayush Chhetri, midfielder Malsawmtluanga, fullback Jerry Lalrinzuala leh forward Daniel Lalhlimpuia te an kawl.

Zanina an hmachhawn tur Odisha pawh Mizo tamna tho an ni a, beisei ang result erawh an nei bik lo. Hetihrual hian ISL dinhmun a chian loh reng avangin Odisha hi an training lawk lo a, league khel tura inbuatsaihna hun an neih dan thlirin an che ṭha lo hi a awm hle.

Odisha hian match nga khelh tawhah vawi khat chiah hnehna an la chang a, vawi hnih draw neiin, vawi hnih an tlawm tawh bawk. He team-ah hian Isak Vanlalruatfela, K. Lalṭhathanga (Puitea), Lalrinfela Khiangte, Jeremy Zohminghlua leh Vanlalzuidika Chhakchhuak te an awm a, zanin chu Mizo player kan hmu nual dawn tihna a ni.

Tlai dar 5:00 inkhel turah pawh Mizo an awm nual. SC Delhi hian an match hmasa panga ngawt hnehna an chan zawh loh hnuah, an matchn hnuhnung berah khan 2-0 a Kerala Blasters ngamin hnehna an chang a, an inrintawk lai tak a ni.

Delhi club tan Augustine Lalrochana'n hmun pawimawh a chang ṭhin a, tawnhriat nei ṭha Isaac Vanmalsawma leh Ramhlunchhunga te an kawl bawk - an lenchilh tur Highlander pawhin Mizo player an kawl nual.

NorthEast hian Aizawl FC forward hlui pahnih Lalrinzuala Hauhnar leh Labiakdika te an kawl a, midfielder Fredy Chawngthansanga an nei bawk - NE United hian match rukah point ruk chiah an la nei a, Delhi lakah chak an tum ang.