Dortmund-in Sancho lakluh tum leh dawn

German club Borussia Dortmund chuan an winger hlui, Jadon Sancho chu an club-ah a vawi thum nana khel turin lakluh an tum leh dawn a, nipui transfer laiin lak an tum ang.

Sancho hian 2017 khan Manchester City aṭangin Dortmund hi a zawm a, Ousmane Dembele thlak tura lakluh a ni. Kum li a khelh chhungin Sancho hi Dortmund player pawimawh a ni a, Barcelona-a an hralh Dembele a thlak zo hle.

Manchester United-in 2021 khan Ole Gunnar Solskjaer hnuaiah pound maktaduai 73-in an lalut a, a man a tam avangin beisei pawh a sang hle. Mahse Sancho-a'n Old Trafford-ah beisei a pha lo a, United tan inelna hrang hrangah match 82 inlanin goal 12 chauh a khung a, August 2023 hnuah United tan a inlan leh tawh lo.

English forward hian loan-in Dortmund, Chelsea leh Aston Villa te a pan a, Villa-ah a la awm mek. Sancho hi loan-a a chhuahnaah pawh beisei a pha chuang lo a, Dortmund-ah khel ṭha berin 2024 khan Champions League final a thlenpui hial.

Dortmund managing director Lars Ricken chuan, "Tlarhma lama khel tur kan melh mek a, team tichak thei tur an ni em? tih kan en a, chu chu Sancho kan thlithlai dan pawh a ni. Player ṭha tak, transfer fee sâng lutuk lo kan zawng mek a ni. Tlarhnung lamah erawh Niklas Süle-a'n min chhuahsan dawn a, Emre Can lah hun eng emaw chen a chawlh dawn bawk avangin, tlarhnung lam pawh kan ngaihtuah a ngai," a ti.

Villa tana khel mek Sancho hian tun season daih chiah United-ah contract a nei tawh, United-ah a hlim loh bawk avangin a contract hi a pawhsei a rinawm loh. Chuvangin pawisa hmang tam duh Dortmund hian, a thlawnin Sancho hi lak leh an duh niin a lang.