Norris-a'n 2026 season nuam a ti lo

Lando Norris chuan kumin free practice-a hun hman ṭhat loh chuan kartawpa an intlansiaknaah nghawng ṭha lo a nei zui ṭhin tih a sawi a, 2026 season chu nuam a ti lo.

Kumin F1 car-te hi technical regulation thar hnuaiah siam an ni a, car tharin thli a dawnna leh engine-ah pawh inthlakthlengna lian tak tak a awm. Driver te chuan car hriatchian nan leh tlan chak dan zir nan round hmasa lamte hi an hmang a. Mahse, Norris erawh kumin practice-ah harsatna hrang hrang a hmachhawn tawh a, Japan-a an tlan hnuhnun ber ṭum pawh khan panganaah a thleng hram.

Norris chuan,"Car thar a la ni a, he hmun pawh hi track thar niin a kawng pawh a mamin hman a nuam zawk hle a ni. Track tharlam tak a nih avangin kum kalta chhunga kan khalh dan ai khan danglam takin khalh a ngai. Suzuka-ah khan driver-te'n car thar an la hriatchian tawk loh avangin chetsualna a thleng fo a, Australia leh China-ah pawh khan a thleng. A hma ai khan tunah chuan a harsa tawh zawk a, driver tan chauh ni lo, engine hnathawh dan hriatthiam leh battery hman dan dik hriat a pawimawh hle," a ti.

Hetihlai hian Formula 1 chuan kum 2026 season chhung hian dante siamrem a ngai em? tih chungchang sawihona an nei ṭan a. Nimin khan dan thar siam chungchang sawihona a vawi khat nan an nei a, he dan thar hi mi tam takin an sawisel hle a ni. Kumin F1 car-te hi F1 chanchina dan inthlak lian ber hnuaia siam an ni a, sawi zui an hlawh hle.

Sawiselna tamna ber chu engine tharah a ni a, hemi-ah hian engine pangngai leh battery chu 50-50 a sem an ni a, battery-a chakna lak khawm leh hman chhuah a ngai nasa hle. F1 car tharte hi inlehpelh kawngah chuan hmuhnawmna awm mah se, car tharah battery energy lak khawm nana thil inthlak danglam chuan sawiselna a ti tam hle.

World champion vawi li ni tawh Max Verstappen chuan he car hi "Mario Kart" ang a ni tiin a sawisel a, inlehpelh dan phung thar lawmtute chuan 'racing dik tak an hrethiam lo' a ti hial a ni. Dutch driver Verstappen hian engine tharin mamawh a ngah lutuk chu a lo sawisel tawh bawk.

World champion ni mek Lando Norris pawhin F1 hi, dan thar avangin car ṭha ber aṭangin car chhe berah a chan phah tiin a sawi tawh a, champion vawi hnih ni tawh Fernando Alonso pawhin tun F1 thar hi 'Battery inelna' tiin a lo sawi ve bawk a ni.