Clippers ngam loh Holmgren leh SGA

NBA regular season khelh zawh a ni dawn tawh a, nimin zing khan playoff khel tura tling tawh Oklahoma City Thunder chuan 128-110 in Los Angeles Clippers an hneh a, Thunder tan an Shai Gilgeous-Alexander leh Chet Holmgren te an langsar lehpek hle.

Intuit Dome, California-a inkhelah ṭan aṭangin team pahnihte an inhnehtawk a, second quarter aṭangin Thunder an chungnung zawk a, an inthlauhna tizau ṭanin an hawi kir tawh lo. OKC tan Holmgren-a'n point 30 score-in a team tan a score hnem ber a, rebound vawi 14 lain double double a siam bawk.

MVP ni lai SGA pawhin point 20 score-in, assist 11 a nei a, double double a siam ve bawk a, a ṭhianpa Holmgren nen Thunder chak nan an thawhlawk hle. Canadian shooting guard hi MVP ni nawn thei turin a dinhmun a ṭha.

Clippers tan Kawhi Leonard (20), Kobe Sanders (17), Brook Lopez leh Jordan Miller (16) te khel chhe lo mah se an vanduai ṭum an tawng a, Clippers chak nan a tawk zo lo. Clippers hi Western Conference table-ah pariatnaah an awm mek a, direct-a playoff khel phâk chinah (parukna) an awm theih tawh loh avangin play-in tournament an khel dawn.

OKC erawh match 80 khel tawhin vawi 64 an chak tawh a, vawi 16 an tlawm tawhin tun season Western Conference-ah a nei ṭha ber an ni a, hmahruaitu an ni. League round-a hmahruaitu an nih avangin playoff first round-ah, play-in tournament-a champion an nen an inhmachhawn dawn a. Phoenix Suns, Portland Trail Blazers, Golden State Warriors leh an hneh zawh hlim Clippers te hi an tum theih zingah an tel.