Gujarat Titans an chak ve ta

Indian Premier League-ah Gujarat Titans-in tun season-a a vawi khat nan chak hmel an hmu a, Nilaini zan khan Delhi Capitals run khatin an hneh. Zanin dar 7:30 hian pakhatna dinhmun luahtu Rajasthan Royals leh champion lai Royal Challengers Bengaluru te a inkhel ang.

Arun Jaitley Stadium, Delhi-ah Titans tan captain Shubman Gill (70) bakah Jos Buttler (52) leh Washington Sundar (55) ten half century an siam vek a, over 20-ah wicket li hlohin run 210 an siam. Titans hi chak mai tura ngaih ni mah se over tawp thlengin chak tur a chiang lo thung.

Delhi opener KL Rahul-a'n ball 52 lekah run 92 a siam a, over tawp berah chak turin run 13 siam a ngai. Mualneitu hi chak turin an dinhmun a ṭha zawk mah a, over tawp ber boruak a sang hle. David Miller-a'n ball thum a la awmin six runs a vaw chhuak a, ball hnih la awmah chak turin run hnih chiah siam a ngai tawh.

Miller a inringtawk a, over tawp ber dawttuah run khat siam theih mah se a tlan duh lo a, ball tawp ber vuak a thlang. Ball tawp berah Miller hian a vaw fuh leh chiah si lo a, an tlan lui a, Kuldeep Yadav a run out a, Titans-in run khatin hnehna an chang.