Kan lo kir leh ang - Zemabawk coach

MSL-a an season khatnaah Zemabawkin semifinal an thleng tawh a, season hnihnaah final an lut leh a, an record hi a namai lo. Champion beiseina sang tak nei mah se an tum ram an thleng zo ta chiah lo a, an coach Liansangpuia chuan ṭha taka lo kir lehin champion an tum leh dawn tih Vanglaini a hrilh.

Zemabawk BC coach Sangpuia chuan,"TBL player te an lian ṭha a, a chhungah kan ngam thlawt lo a ni ber. Ring hnuaiah kan ṭha lo zawk a, kan shooting a kal ṭha lo bawk a, chu chu kan chak loh chhan niin ka hria. First quarter-ah Ropuia'n foul vawi thum a neih nghal avangin kan inthlak danglam deuh a ngai a, fast break tlantu ber leh ball chhuhsak thei ber, duh anga kan chhawr thei lo khan kan game a tichhe bawk.

Season tharah a aia ṭhaa kan kir leh a ngai a, club dang nen khaikhinin foreigner-ah kan inthlau a, a aia ṭha zawkin champion ngei tawh turin kan kir leh theih ka beisei. MBBA te chungah lawmthu ka sawi a, anni zara inelna lian khel thei kan ni," tiin ṭha zawka season thara rawn kir a tum thu a sawi.

MSL hmasawn dan tur chungchang sawiin Sangpuia chuan, "MSL boruak tih nun nan promotional video kan siam hnem a ngai a, MSL hi mipuiin kan hlut zual theih nan social media kaltlangin inelna ṭan dawnah reels te pawh kan siam tam a pawimawhin ka hria. Hei bakah hian hnam dang pahnih luh rual theih hi, Mizo player-ten hma kan sawn theih nan pakhatah chauh luh theih ni tawh bawk se a ṭhat zawk ka beisei," tiin Vanglaini a hrilh.