Pa Tluangtea leh ka fanu tan ka hlan - Coach Mapuia

Khatla TBL champion puitu H. Laldinsanga (Mapuia) hi tualchhung basketball ngainatute tan a mikhual lo a, TBL player hlui a ni satliah lo. Mizote tan basketball-a sulsutu pawimawh a ni a, player a nih laia MSL season hmasa ber pahniha TBL champion puitu a nih bakah Mizo zinga India tana khel hmasa ber a ni. Mapuia hian India tan player angin silver medal a a la tawh a, coach angin India tan gold medal a lo la tawh bawk.

A vawi li nana an champion zawhah Mapuia chuan TBL-in tun dinhmun an thlen theihna chhan R. Malsawmtluanga (Pa Tluangtea) tan a hlan a, kumin January 20 khan fanu thar Rinmalsawmi Hangsing neiin a fanu Asawmi tan a hlan tel bawk. TBL basketball team member zawng zawng tana pa nih tlin em em Tluangtea hi August 6, 2024 khan a thi a, a hnathawh avangin basketball player-ten an ngaina em em a ni.

Saron Veng pa Mapuia chuan, "Kan tum angin kan khel thei a, kan ruahmanna te a hlawhtlin theih nan Pathian malsawmna kan dawng a, a lawmawm hle. Ka hma hun erawh ka sawi chiang thei lo a, club chairman ṭhin R. Malsawmtluanga'n (Pa Tluangtea) a dam laia TBL champion pui leh tura min sawm avanga enkawl ka ni a, tunah kan hlawhtling ta a, ka fanu thar leh Pa Tluangtea tan kan champion nomawi hi ka hlan. Khatla mipuite min ṭawiawmnaah ka lawm em em bawk.

MSL season 11 zet kan nei thei hi a lawmawm ka ti a, chutihrualin eng emaw laiah hian a ṭha zawka thil thlak danglam ngai lai a awmin ka hria a, MBBA leh Zonet te nen kan thawhhona ṭha zel se a, a aia ropui leh changtlung zawkin MSL a kal zel ka beisei," tiin Vanglaini a hrilh a, Khatla mipuite leh TBL ṭantute chungah lawmthu a sawi bawk.

Inkhelh a chawlhsan hnuah team enkawl hna a thawk zui a, tunah Khatla TBL tan lawmna a siam leh ta. Mapuia hian MSL chhiar telin Mizoram Basketball Association (MBBA) hnuaia season tina inelna sang bera TBL hi vawi 10 a champion puina a ni a, a record hi a chhuanawm hle.