IFL : C'ship round-ah Mizo club tan hmun a awm em?

Indian Football League-ah nimin khan Shillong Lajong-in Namdhari 2-0 in an hneh a, Meghalaya club hian Championship round an khel dawn. Lajong goal hnihna khungtu hi Champhai tlangval Ephraim Lalremtluanga a ni.

IFL-ah hian team 10 an awm a, team parukin champion tur an zawng leh dawn. Tun dinhmunah Diamond Harbour, Sreenidi Deccan leh Rajasthan United bakah Lajong te C'ship round khel turin an tling tawh. IFL champion hi Indian Super League khel tura an tlin avangin team paruk khelh tur hi promotion round tiin an sawi bawk.

Hmunruak pahnih la awm hi Mizo club pahnih Aizawl FC leh Chanmari FC tan hnawh khah theih a ni a, chutihrualin Mizo club pahnihte hi an tlin ve ve dawn chuan an khelh hmabakah chak vek an ngai tawh ang.

Aizawl FC hian vawiin tlai dar 4:00 hian Dempo SC an hmachhawn dawn a, Chanmari FC-in zanin dar 6:30-ah I League 3 leh I League 2-a an hneh tawh loh Diamond Harbour an hmachhawn thung ang.