Raphinha leh Yamal-ah Barca innghat mah mah - Koeman

Barcelona player leh coach hlui Ronald Koeman chuan, Barca-in Atletico Madrid an hneh loh hnuah Barca chu Raphinha leh Lamine Yamal te chungah an innghah nasat thu a sawi a, an chak loh chhanah a ngai.

Brazilian forward Raphinha hi hliam vangin a chawl mek a, Yamal erawh a dam ṭha a, amaherawhchu Atletico lakah goal a khung thei lo a, a teammate te khung tur a siamsak thei lo bawk.

Koeman chuan, "Tuna ka hmuh dan chuan Barca game hian Raphina leh Yamal-ah an innghat mah mah a, anni hi player ṭha tak ni mah se an khelh ṭhat loh ṭumin team pumin an tuar ve zel a, an chak loh phah ṭhin.

Atletico lakah pawh Marcus Rashford chiah kha Yamal puitu awmchhun a ni a, midang kha chuan goal khung tumin an nawr na tawk lo. Khatianga an muala Barca an chak lo hmuh kha a hrehawm a, an result a ṭhat chhunzawm loh chuan team dangin Nou Camp-a khelh an huphurh loh phah sawt ang," a ti.

Barca hian zanin dar 10:00-ah Espanyol an mikhual dawn a, match riat khelh tur la awmah Hansi Flick-a naute hi hmahruaitu an ni mek a, an hmelma Real Madrid aiin point sarihin an sang zawk. Catalan club tan Champions League-a an result ṭha lo theihnghilh tir turin an chak a pawimawh dawn a, Real-in an chetsual hun an chân ve reng avangin, champion an duh a nih chuan an chesual thiang lo.