De Zerbi hoin Spurs inlan dawn

Tottenham Hotspur-in tun season-ah coach pathum an nei tawh a, an coach pathumna Roberto De Zerbi hoa an match hmasa ber chu Pathianni zan dar 6:30 hian an khel dawn a, Sunderland an lenchilh ang.

Spurs hian nipui lai khan season hmasaa Europa League nomawi chawipuitu coach Ange Postecoglou an ban a, beiseina sang tak nen Brentford boss Thomas Frank an la lut.

Mahse, Frank hi February 11 khan banin, season tawp thleng atan Igor Tudor an la lut a, Croatian coach hnuaiah hian league match nga khelin, chak an nei lo - vawi li an tlawm a, vawi khat draw an nei!

Premier League table-ah Spurs hi 17-na ni mekin, relegation zone-a awm chin West Ham aia an sanna hi point khat chauh a ni - De Zerbi tan hmabak a hautak a, league match khelh turah Aston Villa leh Chelsea te an la awm avangin zaninah chak nghal a ngai.

Hetihrual hian Spurs player zingah James Maddison leh Wilson Odobert te chu season tawp thleng hliam vanga chawl tur an ni a, Yves Bissouma dinhmun a chiang lo a, Ben Davies, Rodrigo Bentancur, Mohammed Kudus leh Dejan Kulusevski te chu chhawr theih loh tur chiang an ni bawk.

Mahse, De Zerbi a inringtawk a, Italian coach hian kum nga atan London club-ah hian contract a ziak - top flight football khelh chhunzawm beisei lo se, hetianga rei contract a ziak kher lo ang.