Kane a dam chiang tawh em?

German champion Bayern Munich chuan zanin dar 10 hian, St.Pauli nen league match an khel dawn a, Bayern forward Harry Kane dinhmun a chiang lo a, Kane hi a dam chiang lo niin thu lengvak a tam hle. Zanina inlan lo thei dinhmunah a ding.

International break lai khan Kane hian a kerekah hliam a tuar a, a hliam hi na tak ni lo mah se Freiburg lakah a inlan thei tawh lo a, coach Vincent Kompany a lawm lo hle.

Belgian coach chuan, "Thu kan la dawng kim lo a, training hnuhnung bera player te chet dan a zirin thuthlukna siam a ni dawn. Real Madrid hmachhawntu squad ang chiah khan chona hmachhawn thei, rilru sawrbingna, phurna leh thawm na tak nei turin ka duh a ni, chu chu kan tan harsatna a ni ngai lo bawk. Inthlak danglamna kan siam a nih pawhin, kan khelh dan phung kan hloh phah tur a ni lo," a ti.

Thawhlehnia Santiago Bernabéu-a 2-1 a hnehna an chan hma khan, Kane-a fitness chungchang a chiang lo a, a ke rek hliam a enkawl mek avangin England international match-ah pawh a inlan thei tawh lo. Mahse, Real Madrid lakah Kane-a'n bul a ṭan a, goal hnihna a thun bakah an goal hmasa berah inrawlhin a khel ṭha hle.

Chutihrualin, Kane-a khelh danah a dam chiang lo tih hai rual a ni lo a, Kompany pawhin Kane hi na a tawrh theih chin pel thlengin a khel tih a sawi tawh. A tukah erawh hliam hnu hma engmah hmuh tur a awm lo tih a sawi thung.

Tun season-ah Kane a che ṭha a, Bundesliga bikah goal 31 khung tawhin, Robert Lewandowski-a record, season khata goal 41 chu khum a tum mek. Mahse Kane hi hliam vangin a khel lo zeuh zeuh a, zaninah a inlan lo leh a nih chuan Lewy record hi a khum a harsa tawh ang.