Mumbai an chak zo lo

Ningani zan khan Indian Super League hmahruaitu Mumbai City chuan Jamshedpur FC an lenchilh a, 1-1 in an inhnehtawk - Mumbai hi league match riat khelh tawhah an la tlawm lo tluang zel a, mahse, match thum ngawt an khingpui an inhnehtawkpui ta thung.

Mumbai hian first half hun pek belhah Brandon Fernandes hmangin goal hmahruai an khung a, he goal hi an chakpui mai dawn emaw an inti hman tawh. Mahse, minute 90-naah Sarthak Golui chuan Men of Steel tan si phurh a sut a, 1-1 in an ṭin.

JRD Tata Sports Complex-a inkhelah Jamshedpur tan Mark Zothanpuia leh Lalhriatpuia Chawngthu ten inkhel bul an ṭan a, Mumbai lamah dan pangngaiin Lallianzuala Chhangte, Lalnuntluanga Bawitlung leh Hmingthanmawia Ralte (Valpuia) ten inkhel bul an ṭan bawk - bench aṭangin Zothanpuia a lut thung.

Mumbai-in table chung ber la luah chhunzawm mah se, an dinhmun erawh a la him lo hle. Zanin dar 7:30-ah Bengaluru-in Kerala Blasters an mikhual ang a, Pathianni zan dar 7:30-ah Mohun Bagan-in Punjab FC an lenchilh dawn bawk - Bengaluru leh Bagan hi an chak ve ve chuan, khelh zat inangah point khat chiahin Mumbai hi an thlau dawn.