Serena-a'n Martinez leh Chivu a fak

Serie A club Inter Milan forward hlui Aldo Sererna chuan, Lautaro Martinez leh an coach Cristian Chivu chu fakin Inter game thlak danglamtu tiin a sawi. Goal khung bakah ground chhunga a team a kaihhruai danah a fak hle.

Serena chuan, “Lautaro hian engkim a thlak danglam vek a ni. Goal thun thei ringawt a ni lo; team innghahna leh entawntlak khawpa hruaitu ṭha a ni. Parma-a thla tlemte a hman hnuah Inter-ah hian a lo lut a, a fin bakah biak a nuam a, club-ah a tlatlum nghal," a ti.

Juventus leh AC Milan tan pawha lo khel tawh Serena chuan Chivu fak chhunzawmin, "A thil tumte chu Inzaghi aiin danglam mah se, Inzaghi-a kalphung chu a entawn hreh lo bawk. Khingpuite nawr kawngah leh box hnaiha ball chuhsak kawngah te a ṭha hle. Transfer lamah club hotuten an thlawp ṭhat chuan, season thar lehah Chivu-a thiamna tak tak chu kan hmu ang.”

Inter hian Pathianni zan dar 12:15-ah Cesc Fabregas-a enkawl Como an lenchilh dawn a, match sarih khelh tur la awmah Inter hi anmahni hnaih bertu, Napoli aiin point sarihin an sang zawk. An inthlauhna hi a tam loh avangin Inter tan chetsual theihna hun a la awm a, Chivu nauten hian an kut vei lamin champion nomawi an dawm tawhah a ngaih theih a, an thlauh palh a nih chuan champion an phu lo angah a ngaih theih ang.