RYFC Naupang League Inter Dist C'ship a hlawhtling

RFYC - Naupang League Inter-District Championship season 4 chu hlawhtling takin April 11, Inrinni khan RG Stadium, Mualpuiah khelh zawh a ni.

Naupang League hi Aizawl, Champhai, Lunglei leh Kolasib-ah neih a ni a, Inter District inelnaa hi under 12 leh under 14 category bikah neih a ni. Aizawl District aṭangin champion team bakah best of the rest team hnih an tel a, district dang aṭangin champion team leh best of the rest team khat an tel bawk.

Category pahnihah hian team kua ve ve an tel a, U12 final-ah Kolasib United chuan Kolasib Pasalṭha 1-0 a hnehin an champion. Kolasib United player Lalrinchhana chu best player a ni a, Lalrinfela'n golden glove a dawng. Aizawl Sumtual player Malsawmtluanga'n goal 13 khungin golden boot a dawng thung.

Under 14 inelnaa-ah Aizawl team pahnihin final an khel a, Zawlkhawpui leh Aizawl Sumtual te hun pangngaiah 2-2 a inhnehtawkin penalty shootout-ah Zawlkhawpui 3-1 in an chak. Zawlkhawpui champion puitu keeper Rafael Laldawngsanga'n golden glove a dawng a, champion-na kawnga player pawimawh Vanlalmawia'n golden ball a dawng. Aizawl Sumtual player Lalruatkima Chawngthuin goal kua a khung a, golden boot a dawng ve bawk.

Tun ṭum Inter Dist C'ship-a an thupui chu 'build up from the back to attack ' tih a ni a, team hrang hrangin tlarhnung aṭanga ball inpek chhuak ṭanin goal khung an tum thlan avangin inelna buatsaihtute pawh team hrang hrang khelh danah leh player-te hmasawnnaah an lawm hle.