IFL-ah Mizo club-te an chak lo

Indian Football League-ah Aizawl FC leh Chanmari FC ten an khingpui Dempo SC leh Diamond Harbour an hneh lo a, Mizo club pahnih tan Championship playoff khelh theihna kawng la inhawng mah se khel lo ve ve thei dihmunah an ding.

Aizawl FC-in Margao-ah Dempo SC an hmachhawn a, Goan club lakah R. Lalruatfela naute tawnhriat neih tam tawk loh a lang. Dempo tan Marcus Joseph-a'n minute 42-naah goal hmahruai khungin Jose Luis Moreno Pena leh Sebastian Gutierrez ten an khung belh. Goal club-in goal thum an khung a, Mizo club-in a chhanletna an nei lo.

Chanmari FC-in Kolkata-ah I League 3 leh I League 2-a an ngam loh Diamond Harbour an hmachhawn a, first half-a goal a luh loh hnuin minute 47-naah Marlon hmangin Mizo club-in goal an khung hmasa. Mahse, hun tawp lamah Mizo club an talbuai. Goal khungtu Marlon-a'n minute 74-naah an lamah a tilut a, Kolkata club tan substitute Hali Charan Narzary-a'n goal hnih a khung belh bawk.

Aizawl FC-in khualmualah chak hmel la hmu lo mah se an muala result ṭha an neih ṭhat zarah point kua hmuin panganaah an awm a, Championship playoff khelh theihna kawng a la inhawng. Chanmari erawhin Mizo Derby-a an chak loh an tuar a, point riat hmuin pasarihnaah an awm. A sang paruk chinin C'ship playoff an khel dawn a, match khat chauh khelh tur a awm tawh. Chanmariin Namdhari an hmachhawn dawn a, Aizawl FC-in I League an champion-na hmun Shillong-ah Meghalaya club Shillong Lajong an hmachhawn thung ang.