ADFA Inter Village Football 'kick off' a ni ta

MBOCWWB 8th ADFA Inter Village/Local Council Football Tournament 2026 chu Chanmari YMA Hall-ah April 10, Zirtawpni zan khan LESDE Department secretary Dr Lalhriatzuali Ralte, IAS chuan a kickoff. Inelna hi Mizoram Building & Other Construction Workers Welfare Board (MBOCWWB) sponsor a ni a, Aizawl District huam chhunga veng leh khua inelna a ni.

Kick Off zana khuallian Dr Lalhriatzuali Ralte chuan, "Ṭhalai kum 30-50 inkar an boral tam hi a pawi takzet a, a vei awm hle a ni. Kan hrisel zawk nan zuk leh hmuam, ruihtheihthil laka kan fihlim a pawimawh a, taksa insawizawi ṭhat hi a pawimawh takzet," tiin Mizo ṭhalaite a chah a, MBOCWWB pawimawhzia sawi langin kut hna thawktute he welfare hnuaiah hian inziak lut turin a sawm bawk.

Tun ṭum inelnaah hian team 66 an tel a, inelna hi April 15, Nilaini aṭangin RG Stadium, Mualpuiah khelh ṭan a ni ang.