MBA Inter Club Championship: Mizoram Police an champion

Mizoram Badminton Association buatsaih, Yonex-Sunrise LBS SUZUKI MBA Inter Club Badminton Championship 2026 chu neih zawh a ni ta a, Mizoram Police BC chu overall champion niin, gold medal pathum an hlawh chhuak.

Mizoram Badminton Centre, Zuangtuia neih inelna hi April 7, Thawhlehni khan ṭan a ni a, April 11, Inrinni khan a ṭiak - New Serchhip BC chuan medal paruk hlawh chhuak mah se, Mizoram Police aia gold an lak tlem avangin pahnihna an ni.

Mission Veng mawina

Team inelna ngaihhlut hlawh ber Men's team championship final-ah Mission Veng BC leh Sihphir BC te an inhmachhawn a, Mission Veng tan C. Lalramsanga inlan hmasa berin, Sihphir tana inlan Lalpekhluzuala chu straight set-in a hneh nghal.

Second singles-ah Sihphir tan Saitluangpuia Sailo chuan C. Lalramzauva hneh ve leh thungin, 1-1 a ni chiah a, doubles khelh zui a ni. Ramsanga leh Joseph VL Ringngheta te MBC tan ṭangdunin, inkhel hmuhnawm takah Saitluangpuia Sailo leh Joseph Lalhruaitluanga te ṭangdun an hneh a, Mission Vengin 2-1 in hma an hruai zui.

Reverse singles khelh zui a ni a, Joseph-a te pahnih an inhmachhawn - Mission Veng tan Joseph VL Ringngheta inlanin, a theihna sanzia a pholang a, Sihphir tana inlan Joseph Lalhruaitluanga chu straight set-in an hneh - Mission Vengin 3-1 a hma hruaiin, lehpel theih an ni lo a, inelna ngaihhlut berah an champion zui.

Police nge nge

Mizoram Police BC-ten tun hmaa an player neih ṭhat ṭhinte chhawr ṭangkaiin, masters category lam an thunun a, harsatna lian tham awm loin, category pathumah an champion.

35+ Men's team-ah Police tan Lalmuanawma, Samuel Lalnunmawia leh Lalbiaksanga te an tal ngap a, Zarkawt BC hnehin an champion. 45+ Men's team lamah pawh Lalmuanawma leh Lalbiakmawia te hmanga New Serchhip BC hnehin an champion bawk.

55+ Men's team pawh Police chanpual a ni - C. Zahngoa, K. Laltluangliana, Lalthanzuala, leh R. Lalmuankima te an langsar a, final-ah Saron BC hnehin, an tumpuite straight set veka hnehin an champion chiang hle.

A hming Rempuii

Women's team inelnaah New Serchhipin Lalrempuii an kawl chu an vanneihpui a, National Centre of Excellence, Guwahati-a awm mek Rempuii hi a team tana danglamna siamtu niin, hmeichhe inelnaah a champion pui a, final-ah Sihphir chu 2-0 in an hneh.

Under-19 Boy's team final-ah Chaltlang BC-in Vanlalpekhlua Sailo leh Vanlalhruaia Sailo te unau an neih chu chhawr ṭangkaiin, Sihphir BC chu 2-0 in an hneh a, an champion.

U15 Boy's team-ah pawh Chaltlang hian gold lain, final-ah Liansangpuia leh Dennis Romawia Rivung te chhawr ṭawngkaiin, New Serchhip an hneh a, U15 hmeichhe team lamah Lalṭhakimi leh Lalruatkimi hmangin New Serchhipin Saron BC an hneh ve thung.