MBA-in tournament pasarih buatsaih dawn

Mizoram Badminton Association chuan April 10, Zirtawpni khan Mizoram Badminton Centre, Zuangtuiah annual general meeting an nei a, 2026-27 season chhunga tournament pasarih buatsaih turin an rel.

MBA president Dr. Lallianzuala Hnamte kaihhruai inkhawmah hian District Badminton Association hrang hrang 10 aṭangin palai 52 an kal a, 2026-27 chhung atana MBA calendar chu pawm niin, transfer season chu April 11 - 30 chhung hawn a ni.

May thlaa MBA Junior Official Championship 2026 hmangin season thar atana tournament neih tur bul ṭan a ni ang a, tournament buatsaih turte hi club leh District BA thlen duhten dil theih a ni.

MBA hian budget atan Rs. 22,31,259/- an pawm a, budget tam zawk chu MBA buatsaih tournament leh national championship senso atante dah a ni a, heng bakah hian tournament-a player-te lawmman dawn ṭhin tihsan a ni a, tournament thlengtute ṭanpuina pawisa pawh tihsan a ni bawk.