East Bengal tan Edmund a langsar
Edmund Lalrindika'n ISL season a hman ṭhat a chhunzawm zel a, Inrinni zan khan Chennaiyin lakah East Bengal tan goal khungin, Kolkata club hi 3-1 in a chakpui.
Lunglei tlangval hian minute sarihna lekah goal hmahruai a khung a, Chennaiyin tan Irfan Yadwad chuan chhanglet mah se, Bipin Singh leh Nandha Kumar ten Kolkata club tan khung lehin, 3-1 in an chak.
Edmund hian tun season ISL-ah match sarih khel tawhin, goal thum a khungna chiah a ni a, assist vawi hnih a nei tel bawk. Chennaiyin tan Lalrinliana Hnamte leh Laldinliana Renthlei ten inkhel bul an ṭan a, PC Laldinpuia chu bench aṭanga luhtir a ni bawk.
Bengaluru-in coach lailawk Renedy Singh hoin match sarihah point 14 hmu mah se, an duhkhawp lo a, coach thar atan Pep Munoz an ruai. Mahse, Spanish coach hnuaia an match hmasa berah tun season-a chak la nei lo Kerala Blasters chu 2-1 in an ngam lo.
Bengaluru hian Fallou Ndiaye (own goal) hmangin hma hruai mah se, Víctor Bertomeu leh Francisco Feuillassier ten Blasters tan an chhanglet a, 2-1 in an chak daih.
Bengaluru boss hlui Ashley Westwood-a'n Blasters a kaihhruai match hnihnaah chak result a hlawhchhuahpui a, Blasters tan Freddy Lallawmawma chuan bul a ṭan - Bengaluru lamah Lalremtluanga Fanai chu bench aṭangin a lut thung.
Zirtawpni zan khan Sporting Club Delhi chuan 3-0 in NorthEast United an sawp a, Joseph Sunny chuan goal hnih khungin, Mohammed Aimen chuan goal khat a thawh ve bawk. Highlander tan Lalrinzuala chu bench aṭangin a lut a, SC Delhi tan Augustine Lalrochana chuan bul a ṭan ve bawk.
Zirtawpni zanah vek FC Goa chuan an mikhual Odisha chu 3-1 in an lo hneh a, Goan club tan Dejan Drazic, Pol Moreno leh Brison Fernandes (penalty) ten goal khat ṭheuh an khung.
Odisha tana Suhair VP goal khung chu mualpho zualpui khuhna chauh a ni. Goan club tan Ayush Chhetri chuan bul ṭanin, Jerry Lalrinzuala leh Daniel Lalhlimpuia te bench aṭangin an lut a, Odisha-ah K. Lalṭhathanga (Puitea), Isak Vanlalruatfela, K. Lalrinfela leh Vanlalzuidika Chhakchhuak ten bul an ṭan.