Goal nga khungtu Bayern-in record an siam

German champion Bayern Munich chuan Inrinni zan khan 5-0 in St. Pauli an sawp a, Bundesliga season khata goal khung hnem ber record an siamin, goal 105 an khung tling tawh. 1971-72 season-a anmahni record goal 101 chu an khum.

Bavarians tan Jamal Musiala, Leon Goretzka, Michael Olise, Nicolas Jackson leh Raphael Guerreiro ten goal khat ṭheuh an khung a, St. Pauli-in goal an khung ve lo. Millerntor-Stadion-a inkhelah mikhual team Bayern-in an hlauhawm nghal a, minute kuana lekah Konrad Laimer-a ball vawrh luh chu Musiala-a'n chiang takin a tauh lut a, an hmahruaina goal a khung.

Minute khat hnu lawkah Jackson-a'n goal bar a pet per leh nghal a, a per chu Olise tan awlsam taka tauh luh theih ni mah se, French forward hian an hmahruaina belhchhah nan a hmang thei lo. Musiala-a'n a goal hnihna khung theihna hun ṭha nei mah se goal ban pet per nan a hmang a, Bayern-in fiirst half-ah an khung belh thei tawh lo.

Second half-ah Bayern bawk an chungnung zawk a, minute 53-naah Joshua Kimmich-a free kick pet chu Goretzka-a'n chiang zetin a pet goal a, St. Pauli keeper Nikola Vasilj tan dan ngaihna a awm lo.

Vincent Kompany naute an phur laklawh a, minute khat hnu lawkah Olise-a'n mawi takin goal kilah a pet lut a, an goal thumna a nih bakah tun season Bundesliga-a a goal 12-na chiah a ni a, tun season-a winger hmuhn awm ber zinga mi a ni.

Minute 65-naah St. Pauli defender te tihsual nangchingin Musiala'n Jackson tan a pe a, Senegalese forward hian pet goal turin harsatna a nei lo a, an goal lina a khung. Chelsea aṭanga an hawh Jackson hi, Harry Kane a awm avangin hmun a chang tam lo a, mahse a khelh chhunah chuan Kane-a hmun ruak a hnawh khat ṭha thei hle.

Hun tawp hma hretin Guerreiro-a'n St. Pauli defender te ball a chhuhsak hnuah, an goal ngana a khung a, Portuguese midfielder hian a thawhrim rah a hmu. Hun tawp zui nghalin khualmualah nuamsa takin Bayern an chak.

Bayern hian Champions League quarterfinal-ah, second leg khel turin Real Madrid an mikhual dawn a, goal an khung hnem avangin Real lakah Bayern-in inrintawkna an ngah phah ang. Hetihlai hian an goal khung khawl, Kane a chu bench-ah ṭhu mah se luhir a ni lo a, Kompany-a'n English forward hi hahdamna hun a pe.