Milan dinhmun a ziaawm thei lo

Inrinni zan Serie A inkhelah AC Milan chuan 3-0 in an mikhual Udinese an hneh lo a, champion inbeisei Milan hian champion nomawi an hlat zel a, hetianga an kal reng a nih chuan beisei a bo hlen hial ang.

San Siro-a inkhelah mikhual team an hlauhawm zawk a, ball chang tlem mah se an chance neih an hmang ṭangkai thei zel. Minute 27-naah Arthur Atta cross tum chu Milan defender, Davide Bartesaghi-a'n dang pialin an lamah a tilut palh a, Udinese-in hma an hruai.

Udinese an hlauhawm chhunzawm a, minute 37-naah Nicolò Zaniolo ball vawrh luh chu, Jurgen Ekkelenkamp-a'n hnai tak aṭangin a tauh lut a, an hmahruaina a belhchhah.

Minute 71-naah Atta-a'n cool takin a pet goal a, an chak nemnghehna goal a khung. Milan tan Raphael Leao, Christian Pulisic leh Alexis Saelemaekers ten an chance neih an hlah vek a, an vanduai zan an tawng a, goal an khung thei lo.

Milan hi match hnuhnung pangaah vawi thum an tlawm a, hmahruaitu Inter Milan an chetsual duh bawk si loh avangin pathumnaah an tla tawh a, Inter aiin an hnuai chiaha awm Juventus nen an inhnaih tawh zawk.

Massimiliano Allegri naute tan league champion an beiseina a thamral mek a, champion chu sawi loh, Champions League khel phak tur pawhin an chetsual a thiang tawh lo a, match ruk khelh tur an la neihah an chet ṭhat a ṭul ang.