Chuai thei lo LeBron-a'n Lakers chakpui

American veteran forward LeBron James chuan Inrinni zing khan, Los Angeles Lakers chu 101-73 in Phoenix Suns lakah a chakpui a, James hian point 28 leh assist 12 neiin double double a siam a, a kum upa deuh tawh mah se a team tan a la thawh hlawk hle.

Crypto.com Arena, Los Angeles-a inkhelah LeBron a langsar fal nalh a, Suns-in rawn hnaih ṭhin mah se LeBron hmangin Lakers-in point an score a, an inthlauhna an ti zau zel.

James bakah hian Luke Kennard (19), Rui Hachimura (13) leh Deandre Ayton (10) ten James an thlawp ṭha a, an chak theih nan an pawimawh takzet a, inhliam vangin Lakers player te inlan kim thei lo mah se, a inkhel hoin an ai an awh zo.

Suns tan an point guard Devin Booker a inlan lo a, Dillon Brooks (12) leh Royce O'Neale (11) te chiahin point 10 an score tling a, Lakers lakah an zawr. Suns hi Booker tel loin an ṭha tawk lo.

Lakers tan an guard pahnih, Luka Doncic leh Austin Reaves te chu hliam avangin an la khel thei lo a, playoff an khelh hunah erawh an inlan theih tawh a beiseiawm. Lakers hi Western Conference table-ah palinaah an awm a, match khat khelh tur an la neihah an chung chiaha awm Denver Nuggets chu an lehpel thei tawh lo a, palinaa awm chungin regular season an khar dawn.