Min ring ngamtu tan ka chet ṭhat a ṭul - Samson

India T20 World Cup-a champion puitu Sanju Samson chuan Inrinni zan khan Chennai Super Kings a chakpui a, Chepauk-a inkhelah Delhi Capitals run 23-in an hneh. Tun season-a CSK chakna hmasa ber a ni.

Delhi-in vawm hmasak an thlang a, Sanju Samson-a'n hming chher nan hmangin ball 56 lekah thi loin run 115 a siam a, Ayush Mhatre-a'n (59) Kerala tlangval hi a thlawp ṭha viau bawk. CSK hian wicket hnih chauh hlohin run 212 an siam a, Delhi tan target an sang mah mah - run 189 siamin an thi fai vek. Sanju Samson chuan, "Chennai-in min ring ngam a, ka tan sum an seng ngam. Min ring ngamtu tan ka chet ṭhat a ṭul," tiin inkhelh banah a sawi.

Zirtawpni zan inkhelah Rajasthan Royals-in (202/4) champion lai Royal Challegers Bengaluru (201/8) wicket rukin an hneh a, Inrinni khan Punjab Kings-in (223/4) Sunrisers Hyderabad (219/6) wicket rukin an hneh bawk. Zanin dar 7:30 hian hian Sunrisers Hyderabad leh Rajasthan Royals te an inkhel ang.