Relegation zone-ah Spurs an awm

West Ham-in 4-0 ngawta Wolverhampton Wanderers an sawp hnua relegation zone-a awm Tottenham Hotspur an tho chhuak thei lo a, coach thar Roberto de Zerbi hnuaia an match hmasa berah Sunderland chu 1-0 in an ngam lo.

Pathianni zana Spurs inlan hmain, an hnuai chiaha awm Hammers-in Zirtawpni zan khan Wolves an sawp a, relegation zone an chhuahsan. Spurs hi 18-naah an tla thla thung a, Pathianni zanah Black Cats hneh se relegation zone chhuahsan lehnghal tur an ni.

Spurs ṭantuten De Zerbi an lakluh avangin beiseina an nei thar a, Italian coach pawh a inringtawk tih tilangtu chu London club-a cham turin kum nga chhung contract a ziak ngam tlat.

Mahse, ni 44 chhung chauh Spurs enkawl hman Igor Tudor thlaktu De Zerbi-a'n danglamna a thlen thei lo a, amah inring tawk mah se, Spurs player-ten inrintawkna an tlachham tih a lang a, an thatho lo bawk!

Inkhel pumpui thlirin Black Cats chu team thatho zawk leh, tlarhmaah pawh hlauhawm zawk an ni hrim hrim - Dominic Solanke-a'n Spurs tan chance nei mah se, a chhawr thei lo a, minute 61-naah Nordi Mukiele chuan Sunderland tan a khung zui.

Mukiele goal khung danah Antonin Kinsky dem theih a ni lo. Mukiele shot hi Micky van de Ven chuan lo dang pialin, Kinsky rin lohna lamah ball a kal zui a, dan ngaihna a awm lo.

Goal an chhuah hnuah Spurs an tho leh tawh lo a, De Zerbi-a'n tlarhmaah Solanke, Randal Kolo Muani leh Richarlison te rem mah se, player pathumin Black Cats lakah goal an khung thei tlat lo a, an tlawm.

Kolo Muani hian penalty a hlawhchhuakah a inngai a, mahse, referee Rob Jones-a'n VAR kaltlanga a ennawn hnuah a penalty pek tawh a sut - kha penalty kha pe tlang ngat se, inkhel thawnthu a danglam thei ang.

Spurs tan Atletico Madrid laka mualpho tak, keeper Kinsky-a'n first choice keeper Guglielmo Vicario inhliam vangin si ban a nghak a, a tichhe hran lo - Brian Brobbey khung tur nia lang a dante chu a tiṭha hle.

Tottenham an tlawm leh tak avangin Premier League match 14 zet chu a zawnin an chak zo ta lo a, kum 2026-ah an la chak miah lo - December 28-a Crystal Palace an hneh hnuah khan an la chak miah lo tihna a ni a, mualphona a tling.

London club tan an chak loh piah lamah, chanchin lawmawm lo hriat tur a awm tel a, captain Cristian Romero chu keeper Kinsky nen insu palhin, hliam vanga lakchhuah a ngai a, mittui nen khelmual a chhuahsan.

Spurs-in league match ruk chiah khelh tur an nei ta a, an hmachhawn tur zingah Champions League khelh tum Aston Villa leh Chelsea an la tel avangin De Zerbi hmabak a hautak hle.