Atletico muala comeback tum Barcelona

Tun season-ah Atletico Madrid leh Barcelona te vawi nga an inhmachhawn tawh a, zanin dar 12:30-ah a vawi ruk nan leh tun season-a an intawn hnuhnung ber ni turin Champions League quarterfinal second leg an khel dawn.

First leg-ah rinkai ni lo chungin Atletico hi 2-0 in an chak tawh a, dinhmun ṭha zawkah an ding. Barca erawh an muala an chak zawh loh avangin Riyadh Air Metropolitano-ah inlehthalna ropui lantir an tum dawn a, inkhel hmuhnawm a beisei ngam.

Barca squad a chhah

Barca tan Andreas Christensen leh Raphinha te chu hliam vanag khel lo tur chiang sa an ni a, Marc Bernal-a dinhmun a chiang lo bawk. First leg-a red card hmu Pau Cubarsi a inlan thei dawn lo chiang bawk a, Hansi Flick-a'n Cubarsi thlak turin Eric Garcia chu midfielder aṭangin, a position pangngaiah a pawh hnun a rinawm.

Tlarhma lamah Brazilian forward Raphinha awm dawn lo mah se, a hmun ruak hnawh khattu tur an tam a, tun season UCL-a goal ruk khung tawh Fermin Lopez leh goal nga khung tawh Marcus Rashford leh Lamine Yamal te an awm dawn a, match hnuhnung bera goal hnih khungtu Ferran Torres an la nei cheu.

First leg-ah Rashford a vanduai a, vawi tam Atletico tlarhnung rum ṭhaih mah se a chance neih a chhawr ṭangkai thei lo a, zaninah chuan Atletico net tawn puar ngei a tum tawh dawn.

Anni bakah hian veteran striker Robert Lewandowski a awm dawn bawk a, Polish striker hi a kum tam ve deuh tawh mah se mamawh chhanna ni turin theihna sang tak a la nei. Lewy hi Champions League-ah pawh a la ṭha reng a, goal li khung tawhin a la hlauhawm reng.

Lewy hian UCL-ah goal 109 a khung tawh a, khung tam lamah pathumna niin Cristiano Ronaldo leh Lionel Messi chiah a tluk lo - khung belh zel a duh dawn.

Dinhmun ṭha Atletico

Atletico tan an keeper Jan Oblak chuan training zawm tawh mah se a khelh a la rinawm loh a, Juan Musso-a'n a hmun ruak a hnawh khah ṭhat avangin hlauhthawnna tur erawh a awm lo.

Marc Pubill, Matteo Ruggeri leh Rodrigo Mendoza ten training an zawm leh tawh a, Barca lakah an inlan thei tawh dawn a, player pathumte hi first leg-ah pawh squad-ah an awm tawh. Mahse, Pablo Barrios chu a mal hliam vangin a la chawl rih dawn a, Jose Gimenez leh Johnny Cardoso te erawhan dinhmun a chiang lo a, an khelh theih dawn leh dawn loh a hriat loh.

Tlarhma lamah Barca nena sawi zawm mek Julian Alvarez chu an innghahna a ni leh dawn a, Argentine forward hian player thiam bik a ni tih lantirin, first leg-ah free kick aṭangin goal a khung. Alvarez kawppui turin Alexander Sorloth a awm bawk a, anni thlawp tur hian an coach Diego Simeone fapa, Giuliano Simeone leh Ademola Lookman leh David Hancko te an la nei cheu.

Atletico tlarhma ho turin Antoine Griezmann a awm bawk a, Kum 35 mi Griezmann hi season tawpah a chhuak dawn tih a chiang tawh a, Atletico thlah nan Champions League nomawi chawi ngei a duh dawn a, zaninah a club hlui laka goal khung a châk khawp ang.

Engtin zel?

Barca hian Atletico nena European game an khelh hnuhnung panga zinga vawi khat chauh hnehna an la chang a, goal thum chauh an thun bawk.

Mahse inelna hrang hranga an intawn hnuhnung parukah vawi nga an hneh tawh thung.

Barca hi league table-ah pahnihna Real Madrid lakah point kuain an sang tawh a, La Liga-ah an nomawi an kut lehlamin an dawm tawhah a ngaih theih. Mahse, Hansi Flick-a team hian Atletico lakah awlsam taka chak mai theih a ni lo tih an hre chiang tawh a, league-a an hneh ṭum pawhin vanneihna an mamawh. Zaninah pawh goal hnih phur saa an khelh dawn avangin, semifinal lut tur chuan thi leh thau pawlha an ṭan a ngai tawh ang.

Atletico hi kumin European Cup inelnaah vawi li lai an tlawm tawh a, heti chunga quarterfinal an la thleng thei hi a mak hle. Mahse, he inelna bika Barca laka an record neih ṭhatna hian tun ṭuma an inhmachhawnah pawh inrintawkna a pe tih a hriat a, a chungnung zawk an ni.

Simeone naute hian league-ah beisei an pha lo a, champion tuma inel zingah an tel tawh loh bakah, season thara UCL khel tur pawhin tha thlah loa an ṭan a ngai tawh. Chutihrualin Copa del Rey-ah final an lut tawh a, Copa del Rey leh UCL-ah chiah champion beiseina an neih tawh avangin champion ngei an tum dawn a, tlang turin zaninah an goal neih sa humhim a tawk.