Bagan-in Mumbai City an um zel

Mohun Bagan chuan ISL champion nih beiseina an la nei ve zel - Pathianni zan khan Punjab FC lakah vawi hnih ngawt hnufual mah se, si phurh an sut zel a, hun pek belha Jason Cummings-a goal khung hmangin, 3-2 in hnehna an chang zui!

Salt Lake Stadium boruak sang tak hnuaiah Punjab hian Dani Ramirez goal hmangin hma an hruai a, minute 12-naah Real Madrid academy chhuak midfielder hian goal hmahruai a khung.

Mahse, Bagan tan Australian striker Jamie Maclaren chuan si phurh sutin, 1-1 in chawlhlawk an hmang. Second half minute 60-naah season duhawm tak hmangtu Effiong Nsungusi chuan Punjab tan a khung leh a, 2-1 a ni.

Bagan an beidawng duh lo - minute 73-naah bench aṭanga luhtir Sahal Abdul Samad chuan ṭha zetin si phurh sutna goal a khung a, hun pek belhah Australian striker Cummings-a'n chakna goal a khung zui.

Kolkata club-in hnehna an chan avangin ISL champion beiseina a nung zel a, match sarih khelh tawhah point khat chiahin hmahruaitu Mumbai City an phak lo mek - Bagan tan Lalengmawia Ralte (Apuia) chu hliam vangin a inlan lo.

Pathianni zan ISL inkhel dangah Inter Kashi chuan 1-0 in Mohammedan SC an hneh a, Mohammed Asif chuan inkhela goal awmchhun a khung - Mohammedan tan Lalremsanga Fanai leh Zodingliana Tochhawng ten inkhel bul an ṭan a, Remsanga'n goal khungna chance nei ṭhin mah se, a vanneih zan a ni lo.

Mohammedan tan hian Lalthankima (Thathana) leh Lalngaihsaka pawh bench aṭangin an lut a, Ngaihsaka'n goal khungna remchang a neih a chhawr thei lo - Kolkata club an vanduai a, Inter Kashi lakah an tlawm.