Sreenidi chakpuitu Mizo

Indian Football League khelh mekah Pathianni zan khan Sreenidi Deccan chuan 2-1 in Rajasthan United an hneh a, Hyderabad club tan Brandon VL Remdika leh Lalthankhuma ten goal khat ve ve an khung.

Rajasthan tan Issac Nortey chuan khung ve mah se, awmzia a nei phak lo - Sreenidi tana bul ṭan zingah Lalromawia chuan yellow card pahnih a hmuh avangin hnawhchhuah a ni a, hetihlai hian 1-1 a ni.

Player kim loa an khelh hnuah Sreenidi tan Tk-a'n khung belhin, 2-1 in an chak ta daih - match riat khelh tawhah Sreenidi hi table-ah pahnihna an ni a, hmahruaitu Diamond Harbour chu point liin an phak lo mek.

Pathianni inkhel dangah Real Kashmir chuan 6-2 in Gokulam Kerala an sawp a, Kerala club tana Moses Lalrinzuala goal hmahruai khung chu ngam loh chala chil hnawm ang chauh a ni.

Kashmir club hian Shedrack Charles, Ahteeb Ahmad, Marius Obekop (2 goals), Junior Traore (penalty) leh Calvin Baretto hmangin an chhanglet a, Gokulam tana Benjamin Kuku goal khung ve leh chu mualpho zualpui khuhna chauh a ni tawh.