Goal sarih luh zanah Inter an chak

Serie A hmahruaitu Inter Milan chu Pathianni zan khan, an mikhualna ramah Cesc Fabregas-a enkawl Como 4-3 in an hneh a, goal sarih luhna inkhelah Cristian Chivu naute an dingchang zawk a, champion an hnaih leh sawt.

Como tan Alex Valle, Nico Paz leh Lucas da Cunha ten goal khat ṭheuh khung mah se, Inter tan Marcus Thuram leh Denzel Dumfries ten goal hnih ve ve an khung a, Inter an chakpui.

Stadio Giuseppe Sinigaglia, Como-a inkhelah mualneituin ball an chang tam zawk a, table hmahruaitu lakah an zam lo. Como hian goal khung hmasa zawkin minute 36-naah Nico Paz-a shot chu Yann Sommer-a'n dansak mah se, a per chu Alex Valle-a'n a khung lehnghal a, rinkai loh zawk Como-in hma an hruai.

Como-in an la duhtawk lo a, minute 45-naah keeper Jean Butez-a ball pet chhuah chu Nico Paz-a'n a chang a, mawi taka pet kual lutin an hmahruaina a belhchhah. Argentine midfielder hian tun season Serie A-ah goal 10 a khung tling tawh a, club lian ten an hel mek.

Inter an awm mai mai bik lo a, minute khat hnu lawkah Nicolo Barella cross satliah chu Thuram-a'n a tlawh goal a, an siphurh a sut ṭhen a, 2-1 in chawlhlawk an hmang.

Second half-ah Inter an insiamṭha a, ṭan aṭanga minute lina lekah Thuram-a'n keeper pet khumin an si phurh a sut zo. Inter an phur laklawh a, minute 10 hnu lawkah Hakan Calhanoglu ball vawrh luh chu Dumfries-a'n a chiang takin a tauh goal a, an hmahruaina goal a khung.

Dutch defender hian a la duhtawk mai lo a, minute 72-naah Thuram-a ball tauh thlak chu tawih takin a pet lut leh a, an hmahruaina a belhchhah. Como tan minute 89-naah Da Cunha-a'n penalty aṭangin a pet goal leh a, mahse an si phurh sut zo turin hunin a daih loh bakah, an vanduai zan an tawn avangin an mualah an tlawm.

Fabregas-a nauten tun season an hmang ṭha a, season thara Champions League khel turin beiseina an nei mek, mahse an match hmabakah an result a ṭhat loh chuan Europa League emaw Conference League an khelh phah thei dawn.

Inkhel dangah Inter hnaih bertu Napoli chuan 1-1 in Parma an inhnehtawkpui a, point kuain Inter nen an inthlauhna a zauh phah. Serie A-ah match ruk chauh khelh tur a awm tawh a, Inter hi pawhthlak theih la ni mah se an champion a rinawm tawh zawk.