Mainoo-a'n contract thar ziak dawn

Manchester United midfielder Kobbie Mainoo chuan, contract thar a ziak dawn hnai a, kum 2031 thleng cham turin inremna an nei tawh a, kar khatah pound 120,000 a hlawh dawn niin khawthlang chanchinbuten an ziak.

Rawlthar duhawm Mainoo hi January 2023 khan United tan a professional match hmasa ber a khel a, a kum la naupang mah se player pawimawh a ni zui. United tan vawi 96 a inlan tawh a, League Cup leh FA Cup-ah vawi khat ve ve a champion pui tawh a, FA Cup final-ah hian goal a khung nghe nghe.

Mainoo hi Ruben Amorin-a hnuaiah a tlatlum lo a, hliamin a tihbuai bawk avangin United chhuahsan a tum hman a, contract thar pawh a sign duh lawk lo. Mahse, Michael Carrick-a'n United a enkawl hnuah thil a danglam a, team-in hma an sawn bakah Mainoo-a'n mimal takin hma a sawn a, player pawimawh berte zinga mi a ni.

United coach Carrick chuan,"Mainoo hian contract thar a sign ṭep tawh a, eng nge thleng zel dawn tih chu hunin a hril dawn a, tunah chuan engkim a ṭha vek," tiin a sawi.

Hetihlai hian United hian Casemiro thlakna turin midfielder thar an melh ve reng a, Sandro Tonali, Adam Wharton leh Elliot Anderson te chu hming langsar an ni. Mahse Tonali hi Italy lamah kal leh a duh tih thawm a awm bakah hlawh a phut sang a, Anderson pawh Manchester City-in an ngaihven ve avangin United tan a awlsam dawn lo.