Lakers-in chak chungin season khar

NBA regular season khar nan Los Angeles Lakers chuan nimin zing khan 131-107 in Utah Jazz an hneh a, Lakers hian palina ni chungin season an khar a, playoff an khelh hun atan inrintawkna an ngah sawt ang.

Crypto.com Arena, Los Angeles-a inkhelah Lakers an chungnung tluan zak a, Rui Hachimura leh Deandre Ayton ten point 22 ve ve neiin rebound vawi 10 an la bawk a, double double an siam ve ve.

Anni bakah hian LeBron James (18) a khel ṭha a, kum 41 mi LeBron hi an dam kim loh lai pawhin Lakers innghahna ber a ni a, a fapa Bronny James (11) leh Dalton Knecht (17) ten Lakers chak nan an thawh hlawk bawk.

Jazz tan Oscar Tshiebwe-a'n point 29 a nei a, inkhel zingah point a ngah ber a, rebound vawi 17 a la bawk. Jazz tana inlan player pariat zingah paruk zetin point 10 an score tling a, mahse a vanduai zawkah an ṭang a, Lakers hneh nan a tawk lo.

Tun season-ah Jazz-in beisei an pha lo a, Western Conference table-ah a mawng berah an awm a, beisei tur an nei tawh lo. Lakers erawhin April 19, Pathianni zingah playoff-a an match hmasa ber an khel dawn a, Houston Rockets nen an inhmachhawn dawn.