Betis-in hun ṭha bawhpelh

La Liga club Real Betis chuan Pathianni zan khan, an chung chiaha awm Atletico Madrid hnaih theihna hun ṭha nei mah se an chhawr ṭangkai thei lo a, khualmualah 1-1 in Osasuna an inhnehtawkpui.

El Sadar, Pamplona-a inkhelah mikhual team Betis an hlauhawm hmasa zawk a, minute sarihna lekah Arsenal defender hlui Hector Bellerin-a ball pek ṭha zet chu Abde Ezzalzouli-a'n a um lut a, box pawn hret aṭangin goal kilah tak a pet lut a, a team hma a hruaipui.

Bul ṭan ṭha zawk mah se Betis tan beisei angin thil a kal lo a, minute 37-naah defender Valentín Gómez-a'n penalty a chawi a, Osasuna tan Ante Budimir-a'n pet lutin an si phurh a sut.

Osasuna-in chance vawi tam an neih chhunzawm a, mahse an vanduai zan an tawng a, hun tawp thlengin goal dang an khung thei tawh lo. Betis keeper Álvaro Valles a khel ṭha ve bawk. A ui tur zawk erawh Betis an ni.

Betis hi panganaah an awm mek a, hnehna an chan zawh loh avangin palinaa awm Atletico chu point 11 in an pha tawh lo. La Liga match sarih khelh tur la awmah Betis hian an hun ṭha an bawhpelh reng a nih chuan Champions League khel phâk lo thei dunhmunah an ding.